Іздеуде жүрген алаяқ ұсталды

Қазіргі уақытта бөтеннің сенімін теріс пайдалану, алдау жолымен алаяқтық жасайтындар көбейіп барады. Ал бұл қылмыспен күресуді полиция қызметкерлері күн тәртібінен түсірген емес. Осы тұрғыда облыстық полиция департаментке қарасты Криминалдық полиция басқармасының «CyberPol» тобының қызметкерлері жүйелі жұмыстар жүргізілуде.

    Мәселен, полицияға арызданған, облыс тұрғыны белгісіз біреудің әлеуметтік желідегі парақшасына бұзып кіріп, атын пайдаланып, таныстарынан ақша сұрап алып, 55 мың теңге шығын келтіргенін жеткізген. Аталған жайт ҚР ҚК-нің 190-бабы «Алаяқтық» бойынша тіркеуге алынды.

    Жедел уәкілдер бірден қажетті шараларды атқарды. Жан-жақты, тиянақты жүргізілген тексерулер нәтижесінде күдіктінің жеке басы анықталды. Тәртіп сақшылары оны Шымкент қаласындағы жалдамалы пәтерлердің бірінен ұстады. Ол жұмыссыз, Жамбыл облысының тұрғыны болып шықты. Полиция бөліміне жеткізілген жас жігіттің Астана қаласының соты бойынша осындай 42 қылмыстық іс бойынша іздеуде жүргені анықталды.Қазіргі таңда тергеу амалдары жүргізілуде. Күдікті қамауда. Оның жәбірленушілерге келтірген шығын көлемі 2 миллионға жуық. Полиция тергеу барысында жәбірленушілер саны артуы мүмкін екенін жеткізеді.

Т.СЕЙІТХАНҚЫЗЫ