АБАЙ БОЛЫҢЫЗ, ИНТЕРНЕТ АЛАЯҚТАР!

Азаматтарды ғаламтор арқылы 300 мың теңгелік жұмысқа шақырған

Бүгінде ғаламтор арқылы арам пиғылдарын іске асыратын алаяқтардың қатары артып келеді. Түркістан облыстық полиция департаментіне қарасты криминалды полиция басқармасының қызметкерлері осындай іспен айналысқан жас жігітті Шымкент қаласында қолға түсірді. Түркістан облыстық полиция департментінің бізге берген мәліметіне сүйенсек, күдікті өзіне тиесілі ұялы телефоны арқылы ғаламтордағы «ОЛХ» парақшасының жұмыс беремін бөлігінде жарнама қалдырған. Яғни, азаматтарды Атырау қаласы мен Созақ ауданындағы өндірістік мекемелерге вахталық әдіспен жұмысқа шақырып,  жалақысын 200 және 300 мың деп қызықтырады. Бір қызығы, күдікті жарнаманы орналастыру кезінде өзін әр түрлі есіммен (Берік, Рауан, Қайрат) таныстырады. Бүгінде екі қолға бір күрек таба алмай жүрген жұмыссыздар көп емес пе? Сондай азаматтар оған жарнама арқылы хабарласады. Ал, күдікті болса, жәбірленушілердің сеніміне кіріп, «Киви» әмияны арқылы ақшаларын аудартып, ұялы телефонын өшіріп тастайды.
Белгілі болғандай, 6 азамат күдіктінің құрығына ілінген. Оларға келтірілген келтірілген шығын көлемі 2 миллион теңгеге жуықтайды. Қазір алаяққа қатысты тергеу жұмыстары басталды.

Осы орайда Түркістан облысының полицейлері алаяқтардың айла-тәсілдеріне ермей, қырағы болуға шақырады. Егер алаяқтықтың құрбаны немесе куәсі болсаңыз, тез арада «102» сенім телефонына хабар бергендеріңіз жөн.

«Оңтүстік»-ақпарат.