Байырқұмдықтар да күл шығарудан құтылды
Таяуда ғана Арыс қаласындағы Байырқұм ауылының тұрғындары да «көгілдір отынға» қол жеткізді. Салтанатты іс-шараға Арыс қаласының әкімі Қайсар Маңқараев арнайы қатысып, бұл бастама ауылдың әлеуметтік-экономикалық дамуына үлкен серпін беретінін атап өтті. Жалпы, Байырқұм ауылына газ жеткізу мақсатында ұзындығы 24,01 шақырымды құрайтын құбыр тартылған. Жоба бойынша 506 абонент, яғни 3500-ден астам тұрғын табиғи газға қол жеткізіп отыр.
«Байырқұм ауылы – Арыс қаласына қарасты ауылдық округтер ішінде табиғи газға алғашқы болып қосылып отырған ауыл. Алдағы уақытта Көкжиде, Жиделі, Аққала елді мекендері де кезең-кезеңімен газға қосылатын болады. Ауыл тұрғындарының әл-ауқатын арттыру бағытындағы жұмыстар одан әрі жалғасады» деді қала әкімі.
Облыстық өңірлік коммуникациялар қызметі.