Білім мен еңбекті ұштастырған

Бәйдібек ауданы, Боралдай ауылының тумасы Әсемай Шырынбек білім мен еңбекті қатар алып жүрген жас. Жастайынан зеректігімен көзге түскен ол замандастарына үлгі боларлық бастамаларымен танылып жүр.                                                          

Зейінді қыз дарынды балаларға арналған «Iqanat» мектебінде білім алды. Оны 2021 жылы бітірген Әсемай «Алтын белгі» иегері атанып, Оңтүстік Қазақстан мемлекеттік педагогикалық университетіне ағылшын тілі мұғалімі мамандығына грант негізінде оқуға түсті. Бүгінде аталмыш университеттің 4-курсында оқып жүрген ол сыңары Әселаймен бірге «twins_teach»  атты   ағылшын тілі пәнінен оқушыларды ҰБТ-ға  дайындайтын орталық ашты. Сондай-ақ оқушыларды  ҰБТ-ға дайындайтын «125 highschool» атты орталықта ағылшын тілі мұғалімі болып жұмыс істейді. Осылай болашақ ұстаз қазірден тәжірибе жинап, сонымен қатар тіл үйренемін деген ниеттегі жастарға көмектесіп жүр.

Өткен жылы Әсемай Түркиядағы Гази (Gazi) университетінде білім алып қайтты. Бұл оның шетелдік білім беру жүйесімен танысуына, жаңа дағдылар мен тәжірибе жинауына мүмкіндік берді. Енді ол жақтағы жастарды білімге қызықтырудың, тілді тез үйренудің озық та ерекше тәсілдерін өзінің орталығындағы білім беру бағдарламасына енгізбек.

Жас болса да ізденімпаздық пен білімнің арқасында белестерді бағындырып жүрген Әсемайдың өмірі – көп жастарға үлгі.                                       

Айгерім Әмір,

                                      М.Әуезов атындағы ОҚУ-дың 4-курс студенті.