Димаш ағаның әр сапары бір тарих еді...
Қазақстанды ширек ғасырдай басқарған Дінмұхамед Ахметұлы Қонаевтың оңтүстік өңірі дегенде, ондағы еңбекқор халық дегенде ықыласы алабөтен болатын. Елге жадырап келіп, мұндағы жер емген халықты да жадыратып кететін. Ол кісі әр келіп кеткенде елдің рухы бір көтеріліп қалатын.
Сіздер көріп отырған мына сурет 1981 жылдың жазында түсірілген. Астық ору науқанының басталуына орай Дінмұхамед Ахметұлы Шымкент облысына арнайы іссапармен келген кезі. Ол кездегі шаруашылыққа байланысты жиын-жиналыстардың көпшілігі зәулім сарайлардан гөрі егістік алқаптардың басында өтетін. Бұл жолы да сол дәстүр бұзылмаған. Республиканың бірінші басшысы өңір активін Сайрам ауданының «Қайнарбұлақ» кеңшарының егістік алқабының басына жинапты. Кеңшар директоры Әбутәліп ТІЛЕУБЕРДИЕВ (ортада) астық шығымы туралы баяндап тұр. Облыстық партия комитетінің бірінші хатшысы Асанбай АСҚАРОВ (сол жақтан санағанда бірінші), Сайрам аудандық партия комитетінің бірінші хатшысы Василий СУББОТИН (сол жақтан санағанда екінші), шаруашылықтың түрлі сала қызметкерлері, бәрі-бәрі жауапты науқанның барысы туралы әңгімеге құлақ түрген.
Бүгінгі аға ұрпақ жақсы біледі, сол жылдары «Қайнарбұлақ» кеңшарының даңқы облыс асып, республикаға жайылып еді-ау. Ал, кеңшар директоры Әбутәліп аға Тілеубердиев Қазақстандағы ірі шаруашылық ұйымдастырушыларының бірі болатын. Бүгінде осының бәрі ертегі сияқты... Алайда, ертегі түгі де жоқ, мұның бәрі біздің тарихымыздың бір бөлшегі. Иә, бізде осындай жұмыстар болған...
А.БЕКНАЗАРҰЛЫ.