Балаңызды бақылаудан шығармаңыз. Әйтпесе...

Бауыржан ЕРМАН, «Оңтүстік Қазақстан».

Бүгінгі таңда облыстық полиция департаменті жазғы демалысқа шыққан балалардың қауіпсіздігін қамтамасыз етуге және құқықтарын қорғауға ерекше назар аударып келеді. Осыған орай жасөспірімдер арасындағы құқықбұзушылықтардың алдын алу мақсатында «Жасөспірім», «Түнгі қаладағы балалар», «Жасөспірім және жауапкершілік» сынды жедел профилактикалық іс-шаралар өткізіліп жатыр. Бұл жайында журналистермен брифинг өткізген облыстық полиция департаменті Жергілікті полиция қызметі басқармасы бастығының міндетін атқарушы Бегімхан Ахметов айтып берді.
Спикердің сөзіне сүйенсек, жыл басынан бері жүргізілген іс-шаралардың нәтижесінде түнгі уақытта ойын-сауық орындарында болған 198 жасөспірім және үйлерінен тыс жерде жүрген 4 358 жасөспірім анықталып, ата-аналары мен заңды өкілдері әкімшілік жауапкершілікке тартылған. Одан бөлек, кәмелетке толмағандардың түнгі уақытта ойын-сауық орындарында болуына жол бергені үшін 104 мекеменің иесіне Әкімшілік кодекстің 132-бабымен хаттама толтырылған. Құқықбұзушылыққа бейім 427 жасөспірім және бала тәрбиесіне немқұрайды қарайтын 268 қолайсыз отбасы арнайы есепке алыныпты. Осы жұмыстардың арқасында жасөспірімдер қылмысы 11,6 пайызға азайған.
– Кәмелетке толмағандар арасында ең көп кездесетін қылмыс – ұрлық. Бұл санат барлық қылмыстың 51 пайызын құрап отыр. Жасөспірімдердің қылмысқа бару себебі – әлеуметтік теңсіздік, өз ортасындағы өзге балаларға қызығып қымбат ұялы телефон, сәнді киім сынды заттарды алуға ұмтылуы. Анықталған қылмыстардың 67 пайызы түнгі уақытта орын алған. Талдау көрсеткендей, қылмысқа барғандардың басым бөлігі мектеп оқушылары. Осыған байланысты ата-аналарды балаларының қайда жүргенін қадағалап, түнгі 22:00-ден таңғы 6:00-ге дейін өз беттерінше үйден тыс жерлерде болуына жол бермеуге шақырамын. Өйткені, дәл осы мезгілде балалардың қылмыс жасауы немесе қылмыстың құрбаны болуы мүмкін. Ал, балалардың бұл уақытта ата-анасынсыз немесе басқа да заңды өкілдерінсіз жүргені анықталса, Әкімшілік кодекстің 442-бабымен жауапкершілікке тартылатынын ескертемін, – деді Бегімхан Төреханұлы.
Сондай-ақ, полиция өкілі жазғы сауықтыру лагерьлері мен экскурсияларға полиция қызметкерлері бекітіліп, қауіпсіздік шараларын атқарып жатқанын жеткізді. Сонымен қатар, көпшілікті шомылу кезінде де сақтық шараларын сақтауға шақырды. Егер кімде-кім суға шомылу ережелерін бұзса, жауаптыларға Әкімшілік кодекстің 364-бабымен шара көріледі.  
– Жасөспірімдерді тасымалдайтын автобустарға міндетті түрде патрульдік полицияның арнайы автокөліктері ілесіп жүруі керек. Балаларды полициясыз тасымалдауға тыйым салынады. Балалардың өмірі мен денсаулығын сақтау – ересектердің басты міндеті. Ендеше, балалардың демалыс кезіндегі қауіпсіздігін толық сақтау үшін біріге қимылдауға шақырамын, – деді ол сөз соңында.