Сауранда өндіріс те қарқын алған

Бауыржан ЕРМАН, «Оңтүстік Қазақстан».

Мәселен, бүгінде Сауран ауданына қарасты Шаға ауылдық округінде жаңбырлатып суару құрылғылары мен тракторлар құрастырылып жатыр. Сексен адамды тұрақты жұмыспен қамтып отырған «BNK GROUP LTD» ЖШС мекемесі жылына мыңға тарта технология мен қажетті машиналар шығара алады. Тиісінше, олар шығарған техникаларға еліміздің өңірлерінен ғана емес,  шет мемлекеттерден де сұраныс түсе бастады.

– Алдағы уақытта өнімдерімізді алыс-жақын шетелдерге көптеп шығаруды жоспарлап отырмыз. Егін шаруашылығы қарқынды дамыған Түркістан облысы үшін біздің жаңбырлатып суару машиналары және біз құрастыратын тракторлардың маңызы зор деп есептеймін, – дейді мекеме басшысы Ниязәлі Бейсенбаев.

Өңір журналистері мүгедектер қоғамының осы ауылдық округте орын тепкен «Ақниет Холдинг» кәсіп­орнына да бас сұқты. Мұнда тұрақты жұмыс істеп жүрген 100 адам әскери шатыр тігумен айналысады. Оған қоса, өндіріс орны корпустық, жұмсақ және медициналық жиһаз шығаруды да қолға алған.

БАҚ өкілдері табан тіреген келесі бір нысан Қарашық ауылдық округіндегі «Дильназ» шаруашылығы болды. Бұл жылыжайда жыл бойы үйге және көшеге егетін түрлі гүлдер мен ағаштар өсіріледі екен. Раушан, хризантема, лотос, петуния гүлдері мен шырша және жеміс ағаштарының көшеттеріне сұраныс өте жоғары. Ал, елімізде сирек өсетін гүлдерді Қытай, Нидерланд елдерінен тапсырыспен алдырады. Алыс-жақын қалаларға жеткізу қызметі де жолға қойылған. Кәсіпкер Дильназ Омарова гүлді суару үшін заманауи технологияларды қолдануда. Сонымен бірге, бөлме гүлдерін отырғызатын керамикалық ыдыстар мен түрлі мүсіндер де шығарады. Қазіргі таңда бұл жылыжайда көптеген жергілікті тұрғын нәпақаларын айыруда.

Ал, Шорнақ ауылдық округіндегі «TAK Mebel» жиһаз кәсіпорны жылына 12 мың дана жиһаз жасап шығарады. Цехта елуге жуық адам тұрақты жұмыспен қамтылған. Сапалы жиһаздарға сұраныс та жоғары. Өнім сапасын арттыру үшін заман талабына сай материалдар пайдаланылады.

– Өндіріс орны дизайнерлердің қатысуымен сенімді компоненттерді пайдалана отырып, тұтынушыларға тек сапалы жиһаз ұсынуда. Аталмыш кәсіпорынның қызметкерлері шын мәнінде бірегей дизайнерлік жиһаздың керемет коллекцияларын жасап шығарады. Қазіргі таңда «TAK Mebel» жиһаз кәсіпорнының өнімдерін еліміздің бірқатар аймақтарындағы жиһаз дүкендерінен кездестіруге болады. Шетелдік өнімдерден кем түспейтін отандық өнімді тұтыну арқылы жеке кәсіпкерлердің бизнесін дамытқан болар едік, – деді баспасөз турын түйіндеген Сауран ауданының әкімі Мақсат Таңғатаров.