Ескекшілеріміз ерледі

Теміртау қаласында ересектер арасында академиялық есуден ел чемпионаты аяқталды. Дүбірлі сынға еліміздің 5 өңірінен 110 спортшы қатысты. Ел чемпионатында Түркістан облысының спортшылары өте сәтті өнер көрсетіп, 33 медаль жеңіп алды.

Нақтырақ айтсақ, түркістандықтар 24 алтын, 5 күміс және 4 қола жүлде еншіледі. Осылайша, облыстық су спорты түрлері мектебінің өрендері сенімді ақтады. 

Әртүрлі бағдарламалар бойынша облыс құрамасы сапында  Еркежан Сапарқұл, Лияра Айдарова, Айлин Айдарова, Роза Кеңес, Әділет Керімбек, Владислав Яковлев, Мелани Жақыпова, Александр Афанасьев, Иван Чернухин, Владислав Галкин, Валентина Волкодавова,  Мария Лебедева чемпион атанды. 

Жалпыкомандалық есепте бірінші орынды 33 медаль иемденген Түркістан облысының спортшылары еншілесе, екінші орынға астаналықтар тұрақтады. Үздік үштікті қарағандылықтар түйіндеді. 

Спортшыларды айтулы додаға су спортынан Түркістан облысының аға жаттықтырушысы Иван Лукьянов және Александр Степенко, Михаил Горбунов, Байсангур Цатышаев, Виктория Ли сынды бапкерлер даярлағанын айта кеткен жөн.

Баутан ЕСЕНГЕЛДІ,

М.Әуезов атындағы ОҚУ студенті.