Ырыс ынтымақ ұйыған жерге келеді
Оңтүстік өңірінің шаруалары соңғы 30 жылда алғаш рет егістікке кедергісіз ағын су ала бастады. Нәтижесінде мақта терімі рекордтық көрсеткішке жетті. Бұл жетістіктер – көршілес екі ел арасындағы өзара ынтымақтастық байланыстардың нығая түсуінің нәтижесі. Түркістан облысына арнайы келген Өзбекстан Республикасының төтенше жағдайлар министрі, Президент кеңесшісі Тұрсынхан Құдайбергенов пен су шаруашылығы министрі Шавкат Хамраев бастаған делегация ауыл шаруашылығы саласына серпіліс әкелген өзгерістерге куә болып, мақталы аудандардың шаруаларымен кездесті. Еліміздің Экология, геология және табиғи ресурстар министрі Серікқали Брекешов пен Түркістан облысының әкімі Өмірзақ Шөкеев мақтааралдықтардың бүгінгі тыныс-тіршілігімен танысты.
Былтыр Мақтаарал ауданындағы су басқан егістік алқаптарды қайта қалпына келтіріп, шитті мақта егу жұмыстарына көрші елден қолдау көрсетілді. Өзбекстан Республикасының Жызақ және Сырдария облыстарынан 40 арнайы техника мен 250 тонна мақта шиті жеткізіліп, суы тартылған елді мекендердегі шаруаларға көмектесіп, мақта дақылын қайта егіп берген еді. Көршіден келген көмекті мақтааралдық диқандар ризашылықпен еске алады. Оның үстіне биылғы қуаңшылыққа қарамастан мақталы аудандардың шаруалары ағын суды артығымен алды. Сардоба апаты салдарынан Мақтаарал ауданындағы 7 мың 500 гектар егістік алқап зардап шеккен болатын. Егістікке қайтара мақта дәнін себу жұмыстары жүргізілді. Сол кезде Мырзашөл топырағына егілген өзбекстандық «Сұлтан» мақта сұрпы жоғары сапалы өнім берді.
Арнайы делегация «Алмат» шаруа қожалығының мақта алқабында болып, диқандармен жүздесті. Қуаңшылыққа қарамастан ағын суды артығымен алған шаруалар биыл мол өнім аламыз деген үмітте.
Өңірде мақта бағасы өткен жылмен салыстырғанда екі есе өсті. Түркістан облысында 18 мақта өңдеу зауытының 200-ден астам мақта қабылдау бекеті арқылы 1 тонна шитті мақта 300 мың теңгеге қабылдануда. Бүгінгі күнге дейін жоспарланған егіс көлемінің
33 мың гектары теріліп, 70 мың тоннадан астам өнім жиналды.
– Былтыр өзбекстандық техниканың көмегімен топан су басқан егістік алқабына мақтааралдықтар мақта дәнін қайта сеуіп алды. Көрші ағайындар техникадан бөлек, жанар-жағармайын, сұрыпты шитін де тегін беріп отырды. Сол кезде шығынға ұшыраған шаруалар үшін бұл өте үлкен көмек болды. Күндіз-түні тынбай еңбек еткеннің арқасында биыл мақта бітік шықты. Баға да көтерілді. Қазір келісін 300-320 теңгеден сатып жатырмыз. Көрші Өзбекстан елімен келісімге келіп, ағын суды артығымен алдық. Осының барлығы Елбасының қолдауымен, Мемлекет басшысының тапсырмасымен, көрші елмен орнаған достық қатынастың арқасында жүзеге асырылып жатқанын білеміз. Мемлекет қолдауының арқасында тыңайтқыш пен жанар-жағармай жеткілікті. Ел риза. Диқандар табысын еселейтін болды, – дейді «Бағдат» шаруа қожалығының басшысы Дәулетбай Жорымбетов.
Биыл жалпы 110 мың гектар жерден 280 мың тонна шитті мақта теру жоспарланған. Мақта талшығы Еуропаға экспортталады. Сонымен қатар, жиын-терім жұмыстарына 43 мың тонна жанар-жағармай бөлінді. Оның бір литрі 172 теңгеден босатылып жатыр.
Облыс әкімі Өмірзақ Шөкеев Өзбекстаннан келген делегацияны Жетісай қаласындағы «Қыдыр ата» жекеменшік емханасының жұмысымен таныстырды. Заманауи құралдармен жабдықталған медициналық мекемеде 120 емделуші ем қабылдай алады. Клиника дәрігерлері 100 шақырым жерде орналасқан ташкенттік әріптестерімен тәжірибе алмасып отырады.