"Сіз жатқа оқуға тиіс бір өлең..."

Сақ адам сандығын бекіте алады. Есті адам тілін тия алады. Бірақ ешкім ойын тия алмайды.

(Шәкәрім)

Шәкәрім ҚҰДАЙБЕРДІҰЛЫ

Адамдық борышың...

Адамдық борышың – 

Халқыңа еңбек қыл. 

Ақ жолдан айнымай 

Ар сақта, оны бiл. 

Талаптан да бiлiм мен өнер үйрен, 

Бiлiмсiз, 

Өнерсiз, 

Болады ақыл тұл. 

Мақтанға салынба 

Мансаптың тағы үшiн. 

Нәпсiңе билетпе 

Басыңның бағы үшiн.

Өмiрiңдi сарп қыл өлгенiңше,

Жоба тап, 

Жол көрсет, 

Келешек қамы үшiн. 

Қайтадан қайрылып 

Қауымға келмейсiң. 

Барыңды, 

Нәрiңдi 

Тiрлiкте бергейсiң. 

Ғибрат алар артыңа iз қалдырсаң – 

Шын бақыт‚ 

Осыны ұқ, 

Мәңгiлiк өлмейсiң!