Денсаулықты нығайтуға ықпал ететін мектептер

Балалар мен жасөспірімдердің денсаулығы – қоғамның маңызды құндылықтарының бірі. Бала уақытының едәуір бөлігін мектепте өткізетіндіктен, білім беру ұйымы салауатты әдеттерді қалыптастыруда және денсаулыққа жауапкершілікпен қарауға тәрбиелеуде маңызды рөл атқарады.

«Денсаулықты нығайтуға ықпал ететін мектептер» – білім алушылардың денсаулығын сақтауға және нығайтуға, салауатты өмір салты дағдыларын қалыптастыруға, сондай-ақ қауіпсіз әрі қолайлы білім беру ортасын құруға бағытталған кешенді тәсіл. Денсаулықты сақтауға бағытталған мектеп тек жекелеген профилактикалық іс-шараларды өткізумен шектелмейді. Мұнда қауіпсіз әрі қолайлы оқу жағдайларын қамтамасыз ету, санитариялық-гигиеналық талаптарды сақтау, дұрыс тамақтануды ұйымдастыру, жеткілікті дене белсенділігін қамтамасыз ету, білім алушылардың психологиялық әл-ауқатын қолдау және қауіп факторларының алдын алу маңызды.

Негізгі бағыттардың бірі – дұрыс тамақтану мәдениетін қалыптастыру. Білім беру ұйымдарында балаларды құнарлы және теңгерімді тамақтанумен қамтамасыз етуге жағдай жасау, сондай-ақ рационалды тамақтану қағидалары мен тағам өнімдерін дұрыс таңдаудың маңыздылығы туралы ақпараттандыру қажет. Дене белсенділігі де салауатты өмір салтының маңызды құрамдас бөлігі болып табылады. Дене шынықтыру сабақтары, спорттық іс-шаралар, белсенді үзілістер және спорттық инфрақұрылымның қолжетімділігі балалардың денсаулығын нығайтуға, қозғалыс белсенділігін арттыруға және қимыл-қозғалыстың аздығымен байланысты аурулардың алдын алуға ықпал етеді.

Балалардың психологиялық әл-ауқатына да ерекше көңіл бөлінуі қажет. Қолайлы психологиялық ахуал, өзара сыйластық, буллингтің алдын алу, білім алушыларға қолдау көрсету және қарым-қатынас дағдыларын дамыту баланың толыққанды дамуына қажетті қауіпсіз орта қалыптастырады.

Маңызды бағыттардың бірі – профилактикалық жұмыс. Ол инфекциялық және инфекциялық емес аурулардың алдын алуға, жеке бас гигиенасы дағдыларын қалыптастыруға, темекі, алкоголь және басқа да зиянды заттарды тұтынудың алдын алуға, сондай-ақ білім алушылар мен ата-аналардың денсаулық сауаттылығын арттыруға бағытталады. Бұл жобаны тиімді іске асыру мектеп әкімшілігінің, педагогтердің, медицина қызметкерлерінің, ата-аналардың және білім алушылардың бірлескен қатысуын талап етеді. Барлық тараптардың өзара іс-қимылы нәтижесінде денсаулықты сақтау бір реттік іс-шара емес, мектептің күнделікті өмірінің ажырамас бөлігіне айналады.

Денсаулықты нығайтуға ықпал ететін мектеп – баланың физикалық, психологиялық және әлеуметтік әл-ауқатына қолайлы жағдай жасалған білім беру ортасы. Осындай ортаны қалыптастыру өскелең ұрпақтың денсаулығын сақтауға және аурулардың алдын алуға қосқан маңызды үлесі болып табылады.

Ұлмекен ҮСІПБАЕВА,

Шымкент қалалық санитарлық-эпидемиологиялық бақылау департаментінің бөлім басшысы.