Зейнетақы қалай тағайындалады?

ҚР Әлеуметтік кодексіне сәйкес зейнетақы мәселелері бойынша  сұрақтарға ҚР Еңбек және халықты әлеуметтік қорғау министрлігі халықты әлеуметтік қорғау саласындағы реттеу және бақылау  комитетінің Түркістан облысы бойынша департаментінің басшысы – Түркістан облысы бойынша мемлекеттік әлеуметтік қорғау инспекторы Бегман НҰРМАХАНОВ жауап береді.

 

– Елімізде зейнетақы жүйесі қандай төлемдерден тұрады?

 

– Қазақстан Республикасының Әлеуметтік кодексіне сәйкес зейнетақымен қамсыздандыру мемлекеттік базалық зейнетақы төлемінен, жасына байланысты зейнетақы төлемінен, Бірыңғай жинақтаушы зейнетақы қорынан (бұдан әрі – БЖЗҚ) төленетін зейнетақы төлемдерінен және ерікті зейнетақы жарналары есебінен қалыптасатын төлемдерден тұрады.

– Мемлекеттік базалық зейнетақы төлемі дегеніміз не?

– Мемлекеттік базалық зейнетақы төлемі – зейнеткерлік жасқа толған адамдарға мемлекет тарапынан төленетін төлем. Оның мөлшері зейнетақы жүйесіне қатысу өтіліне байланысты айқындалады.

– Жасына байланысты зейнетақы төлемі дегеніміз не?

– Жасына байланысты зейнетақы төлемі – 1998 жылғы 1 қаңтарға дейін кемінде 6 ай еңбек өтілі бар азаматтарға зейнеткерлік жасқа толуына байланысты тағайындалатын төлем.

– Зейнетақы тағайындауға өтінішті қайда беруге болады?

– Өтінішті «Азаматтарға арналған үкімет» мемлекеттік корпорациясы, электрондық үкімет порталы арқылы, заңнамада белгіленген өзге де тәртіппен берілуі мүмкін.

– Зейнетақы тағайындау үшін қандай құжаттар қажет? 

– Зейнетақы тағайындау кезінде, әдетте, мынадай құжаттар ұсынылады:

- жеке басын куәландыратын құжат;

- банк шоты туралы мәлімет;

- еңбек өтілін растайтын құжаттар;

- табыс туралы құжаттар;

- БЖЗҚ-дағы зейнетақы жинақтары туралы мәліметтер.