Ұлтжанды ұрпақ өсіп келеді
Патриоттық тəрбие туралы ойлағанда көз алдымызға ең алдымен кең байтақ еліміз оралады. Сол себепті бұл тақырыпқа келгенде біздің студенттер де, жалпы қазіргі жастар да қамшы салдырмайтын жорғадай тайпала жөнеледі. Өз ойларын ортаға салғанда бірінен бірі озып, тыңдарманын тәнті ететін тақырыптарды сөз етеді. Бұл, әрине, біз үшін үлкен қуыныш.
Таяуда біздің Түркістан жоғары көпсалалы аграрлық колледжінде ТМ9-233 тобының білім алушылары «Патриотизм – ұлттық рухтың асқақ белгісі» тақырыбында ашық сабақ өткізді. Білім алушылар бұл іс-шарада елге, жерге деген сүйіспеншілікке толы жырларын оқып, қазақтың әдет-ғұрып, салт-дәстүрлерін жаңғыртты. Сол күні жастардың көзінен өз еліне, жеріне деген сүйіспеншілікті аңғармау мүмкін емес еді. Олар сабақтан тыс болатын осындай іс-шараларға үнемі қатысып тұруға құмбыл екендерін байқатты. Біз де қазақ халқының дәстүрін, тілін құрметтеп, еліміздің өсіп-өркендеуі жолында тынбай еңбек еткісі келетін жастардың көп екенін көріп қуандық.
Халық Қаһарманы Бауыржан Момышұлының ұлы Бақытжан аға бір сөзін «меніңше, ұлттық намыс болмаса, ұлт батырлары да болмайды. Егер тура мағынасында айтсам, патриотизм – адамды өзінің арғы тегімен жалғастырып жататын арқауы мықты қасиетті жіп» деп түйіндеген екен. Сол айтқандай, бүгінгі жастардың қай-қайсысы да патриоттық тақырыпқа келгенде іркіліп қалмайтынына қарап, ата-бабалардан бермен қарай жалғасып келе жатқан ұлтжандылық қасиетттің сөнбейтініне көз жетті. Ал, біз елін, жерін, тілін сүйер ұлтжанды ұрпақ тәрбиелеуді өзіміздің қастерлі борышымыз деп білеміз.
Жанболат ҚАЗЫБЕКОВ, Айгүл ҰШАҚБАЕВА,
Түркістан жоғары көпсалалы,
аграрлық колледжінің «Жаратылыстану пәндері»
кафедрасының оқытушылары.