Агродрондарды қолдану қай жағынан да тиімді
Гүлдана Айходжаева,
«Оңтүстік Қазақстан».
Сарыағаш ауданындағы Қапланбек жоғары аграрлық-техникалық колледжі ауыл шаруашылығы саласы үшін ендігі жерде ұшқышсыз ұшу аппараттарының операторларын даярлайды. Аталған оқу орнының студенттері өздерінің жобаларын Астана қаласында өткен «Жұмысшы мамандықтар қаласы» фестивалінде таныстырды.
Ұшқышсыз ұшу аппараттарын қолдану ауыл шаруашылығы дақылдарының өнімділігін арттыруға ықпал етіп, шығындарды азайтуға мүмкіндік береді.
«Бұл – өңірдің экономикалық ерекшеліктерін ескере отырып енгізілген жаңа мамандық. Агродрондар химиялық препараттарды 20%-ға, суды 80%-ға дейін үнемдеуге мүмкіндік береді, жанармай шығынын, жұмыс күшін және техниканы қолдану көлемін азайтады. Сонымен қатар, олар тұқымды, тыңайтқыштарды және өсімдіктерді қорғау құралдарын біркелкі енгізуді қамтамасыз етеді» дейді колледж директоры Бағлан Шығанов.
Колледж басшылығы қытайлық компаниямен меморандумға қол қойып, соның аясында мамандарды даярлау бойынша әдістемелік және материалдық-техникалық қолдау алатын болады. Ал, оқытушылар өндірісте тәжірибеден өтеді.
2024 жылы Қапланбек жоғары аграрлық-техникалық колледжі 95 жылдық мерейтойын атап өткен болатын. Бүгінгі күнге дейін 30 мыңға жуық маман даярлаған оқу орнында 1 Кеңес Одағының Батыры, 7 Социалистік Еңбек Epi, 14 Мемлекеттік сыйлықтың лауреаты, көптеген ғылым докторлары мен кандидаттары білім алған.
Сарыағаш ауданы.