Кәсібін ерекше сүйетін жан
Тігіншілік істе
шығармашылықтың да, кәсіпкерліктің үйлесімі бар. Елімізде соңғы жылдары өнеркәсіптің
осы саласына бейімді, табанды жастардың саны артып келеді. Солардың бірі – Мақпал
Нарымбетова бүгінде талантты тігінші-кәсіпкер дәрежесіне көтерілген жан. Ол «Аруназ»
тігін шеберханасының негізін қалаушы.
Мақпал
Түлкібас ауданының Састөбе ауылында тұрады. Шығармашылық әлеуетін «Мирас»
колледжінде дизайнер мамандығы бойынша оқып дамытты. Колледжде алған білімі мен
тәжірибесі оған тігін саласындағы кәсібін бастауға мүмкіндік берді. Өзінің
дүниетанымын «Аруназ» тігін шеберханасы арқылы көрсетіп, кәсібін өрге домалатып
жүр. Шеберхана клиенттердің сұраныстарын тыңдап, әрбір тігін бұйымын ерекше
талғаммен жасап шығарады.
Заманауи сән
үрдістерін ескере отырып, ұлттық үлгілерде киім кешек, көрпе-төсектер тігеді. Шеберхананы
сұранысқа сай дамытып отырады. Ұлттық нақыштағы мерекелік киімдермен қоса
күнделікті тұтынатын киімдер тігеді. Тапсырыс берушілерге түрлі аксессуарлар
ұсынады. Клиенттердің әуесқойлығын арттыруға күш салады. Бұдан бөлек кәсібінде
экологиялық таза материалдарды қолдануға ерекше назар аударады. Тігін
өндірісінің экологиялық жауаптылығын өз бизнесінің басты бағыттарының бірі
ретінде қарастырады.
Мақпал өзінің
кәсіпкерлік жолында түрлі қиындықтарға да тап болды. Бастапқы инвестиция табудың
өзі оңай емес. Ал, жылдам дамыған бүгінгі заманғы нарыққа ілесу де қиын. Оны терең
зерттеу, клиенттермен байланыс орнату да
кәсіпкерлік процестің маңызды сатысы, бөлігі болып табылады. Табандылығының
арқасында осындай қиындықтарды еңсерді. Сапалы тауар тігіп, қызмет сапасын да арттырды.
Көштен қалмауға күш салып отыр.
Мақпал Нарымбетованың
кәсіпкерлік ісінен ұлттық рух, қазақы болмыс сезіледі. Оның «Аруназ» тігін
шеберханасы бүгінде тек киім тігіп қана қоймай, ұлттық мәдениетті насихаттап
келеді. Өз ісін жақсы көретінін айтады. Мақпалдың қажырлы еңбегі, аянбай тер
төккен кәсіпкерлік жолы – жетістікке жетуге талпынған, өзіндік стилі мен
көзқарасы бар жас кәсіпкерлер үшін таптырмас үлгідей көрінеді.
Айшагүл НАСЫР,
М.Әуезов атындағы
ОҚУ-дың студенті.
