Тағам тасымалдауда қойылатын талаптар
Тағамнан уланудың алдын алу бағытында көбіне шикізаттың сақталу жағдайы мен
қауіпсіздігіне, дайын тағам өнімдерінің әзірлену кезіндегі технологиялық процестердің
сақталуына назар саламыз. Дегенмен бұл бағытта шикізаттың, жартылай дайын
фабрикаттардың, дайын тағам өнімдерінің тасымалдануы кезіндегі талаптардың
сақталуы да аса маңызды. Сол талаптарға қысқаша тоқталып өтейік:
- жалпы азық-түлік өнімдерін тасымалдайтын қызметпен айналысатын жеке
кәсіпкер немесе заңды тұлға болсын қызметін бастамас бұрын Қазақстан Республикасының «Рұқсаттар және хабарламалар
туралы» Заңының талаптарына сәйкес Шымкент қаласының санитариялық-эпидемиологиялық
бақылау департаментінің аумақтық басқармасына хабарлама беру;
- азық-түлік
өнімдерін тасымалдайтын тұлғаның медициналық тексеріп-қараудан, гигиеналық
оқытудан өткендігі туралы белгісі және жұмысқа рұқсаты бар медициналық
кітапшалары болуы;
- нысандарға өткізілетін және сауда нысандарынан қайтарылатын азық-түлік
өнімдерін тасымалдауға тек мамандандырылған көлік құралдары мен контейнерлерді
пайдалану;
- көлік құралдары
және контейнерлердің ішкі беті, тағам өнімдеріне арналған сыйымдылықтар уытты
емес тазаланатын, жуылатын және дезинфекцияланатын материалдардан жасалып, тамақ өнімдерін ластанудан (әсіресе нан және
сүт өнімдерін) жануарлардың, оның ішінде кеміргіштер мен жәндіктердің енуінен
қорғауды қамтамасыз ететін жағдайдың болуы;
- тамақ
өнімдері түрлері бойынша бөлек сақталады: ерекше иісі бар тамақ өнімдері мен
бөгде иістерді қабылдайтын, сіңіретін тамақ өнімдерін бөлек сақтау мен тасымалдау;
- қабылдау,
тасымалдау және түсіру кезінде тамақ өнімін атмосфералық жауын-шашыннан,
ылғалдан қорғау;
- азық-түлік өнімдерін
тасымалдау және өткізу кезінде оның қадағалануын қамтамасыз ететін тауардың
ілеспе құжаттарымен, қауіпсіздігін растайтын, сәйкестігін бағалау (растау)
туралы құжаттармен, тасымалдау жағдайлары және сақтау мерзімі туралы ақпаратпен
қоса жүруі сияқты басты талаптардың сақталуы халық арасында тағамнан улану,
өткір ішек және тағы басқа да жұқпалы аурулардың алдын алуда аса маңызды екенін
есте сақтаған жөн.
Айдарқұл АХМЕТОВ,
Шымкент қаласы СЭБД басшысының орынбасары.
