Көктем көңілдеріңізге шаттық сыйласын!
Ардақты аналар!
Аяулы арулар!
Сіздерді халықаралық әйелдер күнімен шын жүректен құттықтаймын!
Қазақта «Әйел қырық шырақты» деген сөз бар. Бұл әйел адамның мықтылығын, оның қадір-қасиетінің биіктігін көрсететін ұлағатты сөз. Әйелге – ана, балаға – дана деп қарауды үйрететін ұлттық танымның өзегі – әйелге деген сыйластық – бүкіл елге деген құрметтің нышаны деген танымнан бастау алады.
«Еліміздің қыз-келіншектері жасампаздық қасиетімен қоғамның құндылықтар жүйесін жаңартуға және Әділетті Қазақстанды құруға өлшеусіз үлес қоса береді деп сенемін» деген Мемлекет басшысы, әйелдерге жан-жақты жағдай жасау, олардың құқығын қорғау және отбасы институтын нығайту – мемлекеттік саясаттың негізгі басымдығы болып қала беретінін айтты.
Әрбір қазақстандық отбасының бақытты өмір сүруіне жағдай жасауды мақсат тұтқан «AMANAT» партиясы, әйелдердің қоғам өміріне және елдің жан-жақты дамуына қосар үлесін молайтуда Әйелдер қанатын құрғаны белгілі. Ана мен балаға лайықты қамқорлық көрсету, әйелдердің бастамашылдығын қолдау, оларды мемлекеттік шешімдер қабылдау үдерістеріне белсене тартуда Әйелдер қанаты атқарған істердің ауқымы кеңейіп келеді.
Ұлт уызы – оңтүстік деп бағаланған Түркістан өлкесінде 1,2 миллионнан аса әйелдер жасайды. Республикадағы әрбір бесінші бала осы өлкеде дүниеге келеді. Облысымызда 183 мыңнан астам көп балалы ана бар. 68 мыңға жуық қыз-келіншек шағын және орта бизнес саласында еңбек етеді. Мемлекеттік қызмет саласында бір жарым мыңнан астам ару еңбек етсе, оның 15 пайыздан астамы бірінші басшы лауазымдарында қызмет атқарып, артылған сенімнің үдесінен шығып отыр.
Облыс бойынша 84600-ден астам партия мүшесінің 67 пайызға жуығын белсенді қоғамдық ұстанымы бар әйел азаматтарымыз құрайды. Қыз-келіншектер жетекшілік ететін 69 бастауыш партия ұйымы білім беру ісінде, медицина саласында, өнер мен мәдениетте, кәсіпкерлік саласында партиялық қызметті серпінді жүргізіп жатқан құрылымдардың сапында екенін мақтан тұтамыз.
Мемлекет басшысының Жарлығымен 2025 жыл – жұмысшы мамандықтары жылы болып жарияланғаны белгілі. Атаулы жылға орай, «AMANAT» партиясының Түркістан облыстық филиалы халықаралық әйелдер күні мерекесі қарсаңында Кентау қаласындағы №5 Жылу энерго орталығында қызмет атқаратын аруларды құттықтап, ізгі тілегін жеткізді. «Өндірістегі әйел – ел құрметіне ие» мерекелік іс-шарасы аясында аталған мекемедегі 81 қыз-келіншекке құрмет көрсетілді.
Қымбатты арулар!
Көктемнің шуағы көңілдеріңізге шаттық нұрын сыйласын!
Шаңырақтарыңызға береке, еңбектеріңізге толағай табыстар тілеймін!
Алтынсаны ҮМБЕТӘЛИЕВ,
«AMANAT» партиясы Түркістан облыстық филиалының төрағасы,
Түркістан облыстық мәслихатындағы
партиялық фракцияның жетекшісі.