Мақта терімі басталды
Негізгі күн көрісі ауыл шаруашылығы саласы саналатын аграрлы аймақ – Жетісай ауданының диқандары үшін әрбір күн мен сағатты тиімді пайдалану өте маңызды.
Ала жаздай таңның атысынан кештің батысына дейін егістік алқапта тынымсыз еңбек етіп, еңбексүйгіштіктің озық үлгісін көрсетіп келе жатқан жетісайлық шаруалар мақта терім науқанын бастап та жіберді. Өнімділік те жаман емес.
Ауданда мақта терім науқанын алғашқы болып бастағандардың бірі – осыдан 21 жыл бұрын диқаншылыққа ден қойып, несібесін Жер-Анадан терген Қызылқұм ауылдық округінде орналасқан «Айдар» шаруа қожалығының төрағасы Ербол Айтуғанов.
Иелігіндегі 14 гектар жерге Қытайдың «60» сортының шитін сепкен шаруа биыл гектарынан орта есеппен 50 центнерден өнім алуды жоспарлап отыр. Өйткені, бұл сорттың бұған дейінгі мақта сорттарына қарағанда талшығы көп, шиті аз. Агротехникалық шаралары дұрыс жүргізілсе мол өнім алу мүмкіндігі де жоғары. Жаңа сорттың мол өніміне сенім артып, өткен жылы лизингке 1 комбайн мен 3 трактор алған Ербол «биыл баға дұрыс болса» дегенді айтады.
– Ағын судан, минералды тыңайтқыштардан биыл қиындық көрмеуіміздің нәтижесінде өнімділік жақсы. Бұрындары біз мақтаның «Сұлтан», «Мақтаарал», «Бұқара» деген сорттарын егетін едік. Өнім 20-25 центнерді құрайтын, көбісін құрт жейтін.
Биыл Қытайдың «60» деген сортын ектік, құрт та жемеді. Гектарынан 50 центнерге дейін өнім аламыз деп жоспарлап отырмыз, – дейді «Айдар» шаруа қожалығының төрағасы Ербол Айтуғанов.
Биылғы жылы ауданның 79,3 мың гектар суармалы жерінің 40,8 мың гектарына мақта шиті егіліп, қазірдің өзінде 200 тоннаға жуық мақта терілген. Науқанға 715 дана трактор мен 897 дана трактор тіркемелерін, 61 дана ОВХ мен 232 дана мақта терім машиналарын жұмылдыру көзделген.
Өткен жылы 45 мың гектарға мақта шитін сеуіп, 122 мың тонна ақ ұлпа жинаған жетісайлық шаруалар биылғы жылы да сол межені орындауға ниетті. Өйткені, өнім сапасын арттырып, ағын суды үнемдеудің тиімді технологиясы саналатын тамшылатып суару әдісі биылдың өзінде 2 мың гектарға артқан. Оның 300 гектардан астамы мақта дақылын өндірушілердің еншісінде.
Облыс әкімінің баспасөз қызметі.