Білім-инновация лицейіне оқушыларды емтиханға тіркеу басталды
Түркістан облысында жаңадан Білім-инновация лицейі салынып жатыр. Екі блоктан тұратын ғимаратта ұлдар мен қыздар бөлек оқытылады, жатақханалары да бөлек болады. Айта кетейік, қыздар лицейі облыста алғаш рет ашылып отыр. Облыс әкімінің орынбасары Бейсенбай Тәжібаев Түркістан қаласында бой көтерген білім нысанының құрылысымен танысты. Облыс орталығында салынып жатқан жаңа мектептің ішін аралап, құрылыс сапасын бағамдады. Мердігерге жұмысты сапалы атқаруды тапсырды. Облыстық адами әлеуетті дамыту басқармасының басшысы Дінислам Болат-ханұлы лицейге қатысты жоспарларды баяндаса, облыстық құрылыс басқармасының басшысы Тоқтар Усубалиев ғимарат құрылысы жөнінде айтып берді.
– Облыс әкімі Дархан Сатыбалдының тапсырмасымен білім саласында ауқымды жұмыс атқарылып жатыр. Соның бірі әрі сәтті шешім ретінде Білім-инновация лицейінің бой көтеруін айтуға болады. Бұл білім ұясы өңірде білім сапасын арттыруға, Түркістанды білім мен ғылым орталығына айналдыруға үлес қосады деп сенеміз. Себебі, Білім-инновация лицейлері елімізде үлкен беделге ие екенін білеміз. Кентау қаласында балабақша ғимаратында ашылған Білім-инновация лицейі жаңа оқу жылынан бастап Түркістан қаласынан жаңадан салынған ғимаратқа көшеді. Демографиялық өсімнің жоғары болуына байланысты өңірде жыл сайын жаңа мектептер салу қажеттілігі туындап жатыр. Мектеп тапшылығының алдын алу бағытында жүйелі жұмыс жалғасады, – деді Бейсенбай Тәжібаев.
Жауапты мердігер компания өкілдері қазіргі таңда құрылыстың 77%-ы аяқталғанын айтады. Сыртқы-ішкі әрлеу жұмыстары мен техникалық базамен қамтамасыз ету қалды.
Бұдан бөлек, облыс әкімінің орынбасары білім ошағының мәжіліс залы мен спорт залы, гимнастика залдарын да аралады. Жаңа ғимараттағы жатақхана 500 орынға арналған. Ол 2023 жылы қыркүйек айында ашылады деп көзделген. 700 орынды оқу ғимараты базасында 30 сынып, 15 лабораториялық, 23 қосымша кабинет бар. Ал, асханада бір мезгілде 250 шәкірт тамақтана алады.
Лицейге оқушылар 7-сыныптан бастап қабылданады. Ұлдар мен қыздарға арналған Білім-инновация лицейін жаңадан құру бойынша ұлдар үшін 400-ге жуық орынды, қыздар үшін 300-ге жуық орынды мектеп-лицейін ашу көзделген.
Түркістан Білім-инновация лицейі 2023-2024 оқу жылына 7-8-сынып оқушыларын қабылдау жұмысын бастап кетті. 7-сыныпқа үміткерлер (6-сынып оқушылары) bilemtihan.kz сайты арқылы онлайн форматта құжаттарын жүктейді және емтиханға тіркеледі. Емтиханға тіркелу 27 сәуір, сағат 23:59-ға дейін (Астана уақытымен) жүргізіледі. Емтихан екі кезең бойынша өтеді. Нәтижесі емтихан өткеннен соң 5 жұмыс күнінен кейін жарияланады.
8-сыныпқа үміткерлер емтиханға тіркелу үшін құжаттарын Түркістан қаласы, Жолбарысхан көшесі, 1/1 үй, «Неке сарайы» ғимаратында («Hampton by Hilton» қонақүйінің жанында) тапсырады. Емтиханға тіркеу 27 сәуір, сағат 18:00-ге дейін жүргізіледі. Қазірдің өзінде қыздар бойынша 7-сыныпқа
300 оқушы, 8-сыныпқа 170 оқушы тіркеліп үлгерген.