Кітап – ұлттың рухани байлығы

Бүгін – руханият пен білімнің, ой мен сана биігінің айрықша мерекесі – Ұлттық кітап күні! Баршаңызды осы мәні терең, мазмұны бай күнмен шын жүректен құттықтаймын!

Кітап – адамзаттың ақыл-ойының, жүрек түкпірінен шыққан ең асыл сезімдерінің айнасы. Кітап – тәрбие құралы, білім бастауы, ой қазынасы. Ғалымдардың сөзімен айтсақ, "кітап – ұлттың рухани байлығы, тарихы мен тағдырының көрінісі".

Абай атамыз: "Артық ғылым кітапта, ерінбей оқып көруге" – деп, кітаптың адам өміріндегі орнын айрықша атап өткен. Ал Мұхтар Әуезов: "Кітап – адамзат баласының ортақ ақыл-ойының жемісі" – деп, кітапты ұрпақтар сабақтастығының алтын көпіріне балаған.

Әлемнің данышпан тұлғалары да кітаптың қадірін ерекше бағалаған. Ғұлама Альбер Камю: "Нағыз еркіндік кітаппен басталады" десе, Лев Толстой: "Жақсы кітапты бірінші рет оқу – бұрын көрмеген досыңмен танысқандай, ал қайта оқу – ескі досыңмен қайта қауышқандай", – деп сипаттаған.

Қазіргі цифрлық дәуірде де кітаптың маңызы төмендеген жоқ. Керісінше, шынайы білім мен терең ойдың қайнар көзі ретінде, кітап бізді рухани жұтаңдықтан қорғайды. Әсіресе жас ұрпаққа кітап оқу әдетін дарыту – біздің ортақ борышымыз.

Осы мереке күні баршаңызды кітап оқуға, кітапты насихаттауға, оны сүюге шақырамын! Кітап – тек оқу құралы емес, ол – өмірлік серік, ішкі дүниеңді байытатын сенімді жолбасшы.

Кітап күнінде әр үйде жаңа кітап ашылып, әр жүректе жаңа ой туса – бұл мерекенің мәні де, сәні де арта түспек.

Ақнұр НАЗАРОВА,

«Түркістан облысының мемлекеттік архиві» КММ-нің архив құжаттарын пайдалану және жариялау бөлімінің ғылыми қызметкері.