Жарыста жүлдегер атанды
Тараз қаласында біліктілікті арттыру, озық әдіс-тәсілдерді анықтау, жоғары өнімді еңбекті қамтамасыз ету, жұмысшы мамандығының беделін арттыру мақсатында «Интергаз Орталық Азия» компаниясының ұйымдастыруымен «Үздік Маман-2024» байқауы өтті.
Байқаудың мақсаты – жұмысшылар арасында тәжірибе алмасу, кәсіпқойлықты шыңдау, газ тасымалдау саласына қажетті мамандықтардың беделін арттыру, сонымен қатар қызметкерлерді ынталандыру.
Жұмысшылардың кәсіби шеберлігін шыңдайтын байқауға компанияның барлық аймақтық өндірістік филиалдарынан тоқсан үміткер қатысып, өз тәжірибелерімен бөлісті. Қатысушылар екі күн бойы 13 номинация бойынша бақ сынады.
Республикалық дәрежеде өткен аталмыш байқауға «Интергаз Орталық Азия» АҚ Шымкент филиалының жұмысшыларын сала ардагерлері С.Кульчиманова мен С.Исмаиловалар тыңғылықты дайындап, оза шабуларына көп көмек көрсетті. Ардагер кеңесшілердің еңбегінің арқасында команда жарыстың бас жүлдесін жеңіп алып, «Үздік Маман-2024» кубогын иеленді.
Байқау жеңімпаздары мақтау қағаздарымен марапатталды.
Г.ӘШІРОВА,
Республикалық газ саласы ардагерлерінің Шымкент қалалық филиалының төрағасы.