Сіз жатқа оқуға тиіс бір өлең...

Гүлзәкира ӘБІЛДАЕВА

Өзгерді...

Өзгерді...

Бәрі өзгерді...

Сен де...

Мен де...

Көк атты ұқсас көңіл көлденеңге.

Өзіңді есіме алам кешеу күзде,

Сезімнің қоламтасы сөнбеген бе?

Сенімен сенім қосқан кез есімде,

Шынымен сол күндерден безесің бе?

Сүлеймен кекті буға айналдырған

Кеудемнің дию жатыр көзесінде.

Іргемнен күздің желі есті есіре,

Қоймайды-ау уақыт гүлді өшпесіне.

Табысқан біз екеуіміз тамбурында

Өзгерді пойыздардың кестесі де.

Қыс келсе, бұрқырайды қыр ақпаны,

Оралмас сол бір көктем жырақтағы…

Дариға-ай, сен деп соққан жүрегімнің

Дүрсілі өзгермейді бірақ-тағы!