Түркістанда Президент ауызашары берілді

Түркістанда қасиетті Рамазан құрметіне ел Президентінің ауызашары өтті. Игі шараға облыс әкімі Дархан Сатыбалды, облыс тұрғындары, ақсақалдар алқасының мүшелері, зиялы қауым өкілдері мен еңбек ардагерлері, имамдар қатысты. Өңір басшысы жиналған қауымды қасиетті Рамазан айымен құттықтап, ізгі ниетін жеткізді.

– Биыл Рамазан айы Наурыз мерекесіне тура келіп отыр. Наурыз мейрамы елімізде, өңірімізде жаңа серпінде атап өтілуде. Кеше еліміз бойынша «Көрісу күні – Амал мерекесі» атап өтілсе, бүгінгі күн қайырымдылыққа, ізгілікке бағытталып отыр. Әр күн осындай мән-мағынаға толы. Жалпы, осынау қасиетті айда Құран кітабы жерге түскен, ол адамзаттың өмір сүру ережесі болып саналады. Президентіміздің атынан барлық өңірде ауызашар ұйымдастырылып отыр. Бұл Қасым-Жомарт Кемелұлының еліміздің мәдениеті мен дініне деген құрметі деп білеміз. Бүгінгі шараға аудан, қалалардан да зиялы қауым өкілдері, белсенді азаматтар келіп отыр. Түркістанымызға ерекше көңіл бөлінуде. 2024 жыл Түркістан – Түркі әлемінің туристік астанасы атанып отыр. Тағы бір қуанышты жағдай, Мемлекет басшысы киелі қаламызға ерекше мәртебе беруді ұсынды. Былтыр екінші Ұлттық құрылтай да біздің өңірде өтті. Марал Ишанның Құран кітабы Қожа Ахмет Ясауи кесенесіне әкелінді. Президентіміз Атырау облысында өткен Ұлттық құрылтайдың үшінші отырысында бізге кесене құлпытасын қалпына келтіруді міндеттеді. Оразада адамгершілікті дәріптейтін амалдарды көптеп жасау керек. Баршаңыздың ниетіңіз қабыл болсын, – деді Дархан Амангелдіұлы.

Рухани жиында ізгілікке жетелейтін уағыздар, өсиеттер, қазақтың өнегелі термелері айтылып, жанға шуақ сыйлайтын дәстүрлі әндері шырқалды. Ел ағалары елді бірлікке бастайтын мағыналы ойларын айтып, өңір жұртшылығын Рамазан айымен құттықтады. Ас соңында Қазақстан мұсылмандары діни басқармасының Түркістан облысы бойынша өкіл имамы Ержан Төлепов Құран бағыштады.

Облыс әкімінің баспасөз қызметі.