Гүл өсіру – табыс көзі
Жетісайлық ағайынды гүл өсірушілер бір көктемде 6 млн. теңге таза табыс тауып отыр. Бүгінде «адал кәсіп істеймін» деген кез келген адамға мүмкіндік мол. «Жаңадан кәсіп ашамын» немесе «кәсібімді кеңейтемін» дегендер үшін түрлі мемлекеттік қолдаулар көрсетіліп, арнайы бағдарламалар жүзеге асырылып жатыр.
Мемлекетке алақан жаймай-ақ қолдағы барымен кәсібін бастап, тың идеяларын жүзеге асырып, тиыннан теңге құрап, шағын кәсіптің өзінен толағай табыстарға жетуге болатынын дәлелдеп жүрген жандар аз емес. Солардың бірі – Жетісай ауданына қарасты Қазыбек би ауылдық округі, Қазыбек би ауылының тұрғындары Жамшид, Рашид Нартаевтар.
Осыдан 15 жыл бұрын көршілес Өзбекстаннан Қазақстанға қоныс аударған азаматтар кәсіптерін үйіргелік 3 соттық жер теліміне жылыжай салудан бастаған. Бөлме гүлдерін өсіру мен сату ісін өркендетіп, табыстарын арттырып отырған жігіттер бүгінде жылыжай аумағын 15 сотыққа жеткізген.
Қарапайым ауыл тұрғындарының жылыжайында бөлме гүлдерінің 20-дан астам түрі өсіріледі. Көздің жауын алатын әсем гүлдер негізінен Жетісай, Мақтаарал аудандарымен қатар Шымкент қаласының базарларында сатылады екен. Бағасы да аса қымбат емес. Қалтаға қонымды.
«Жылыжайымыз көмірмен жылытылады. Гүл деген нәзік келгендіктен, жылыжай ішіндегі ауа температурасына баса мән береміз. Біздегі гүлдердің ерекшелігі сол – бәрі құмыраға отырғызылады. Яғни, бізде өсірілетін гүлдерді үй ішінде күтіп-баптауға болады. Сұраныс та жаман емес. Жыл он екі айда үш-төрт реттен өнім аламыз» дейді Рашид Нартаев.
Қазірдің өзінде 10-ға тарта жергілікті тұрғынды тұрақты жұмыспен қамтып, бір көктемде 6 млн. теңге таза табыс тауып отырған ағайынды Нартаевтар түрлі салаттар әзірлеуді де қолға алған. Қырыққабат, қияр, қызанақ егу мен тұздау ісін де жүйелі жолға қойған. Гүл өсіруді аса қиын іс емес деп ойлайтындармен жетісайлық гүл өсірушілер келіспейді.
«Алғашқы жылдары гүл өсіру ісіне күле қарап, мол табыс әкелетініне сенімсіздік білдіргендер аз болған жоқ. Алайда, мен жылдан-жылға тәжірибе жинақтап, гүлді күтіп-баптауға ерекше мән бердім. Күнделікті ізденіс мені осындай толағай табыстарға қол жеткізуге жетеледі. Бүгінде өзімнің сүйікті кәсібім бар. Айлық табысымыз бір әулетті асырауға жетеді» дейді олар.
Табыстың көзін тауып, ерекше кәсіпті меңгерген ағайынды жігіттер үйіргелік жылыжайын үшке бөліп қойған. Біріншісінде тұқымнан көшет өсірсе, екіншісінде жер сіңдіреді. Үшінші бөлігінде дайын гүлдер ыдысқа жайғастырылып, сауда нүктелеріне жөнеледі.
Сәбит ҚАЛДЫБАЕВ. Жетісай ауданы.