ЖЕТІСТІКТЕР КӨП, КЕМШІЛІКТЕР ДЕ АЗ ЕМЕС

Полицияның күнделікті қызметінде заманауи технологияларды кеңінен қолдану - Мемлекет басшысының ішкі істер органдарының алдына қойған басты міндеттерінің бірі.

ҚР ІІМ орынбасары Сәкен Сәрсенов жұмыс сапарымен Түркістан қаласына келіп, департаменттің мәжіліс залында жеке құраммен жедел кеңес өткізді. Жиында 2024 жылдың қорытындысы бойынша облыс полицейлерінің атқарған жұмыстары туралы облыстық полиция департаментінің бастығы Мұрат Қабденов баяндама жасады.

Жиында Сәкен Сейітжаппарұлы анықталған кейбір кемшіліктер бойынша полицейлерге сын-ескертпелер беріп, тапсырмалар мен ұсыныстарды дер кезінде орындау керектігін жеткізді. Бірқатар басшы құрам өкіліне шара көріліп, қылмыс пен құқық бұзушылықтарға жол бермеу бағытында жұмысты күшейтуді, заң мен тәртіпті қатаң сақтауды тапсырды.

Министрдің орынбасары одан әрі Жедел басқару орталығындағы цифрлық шешімдердің орындалуын тексеріп шықты. Облыстағы бейнекамералардың жұмыстарымен жіті танысып, департамент қолданысындағы соңғы үлгідегі цифрлық технологиялардың жұмысын бақылады. Мұнан соң ҚР ІІМ-нің орынбасары С.Сәрсенов облыс әкімі Нұралхан Көшеровпен кездесті. Әкімдікте цифрландыру, мемлекеттік қызметтер көрсету және архивтер басқармасының басшысы М.Айнабеков және аппарат басшысы Е.Дауылбаевпен де кездесу өткізді.

Ішкі істер министрі орынбасарының айтуынша, полицияның күнделікті қызметінде заманауи технологияларды кеңінен қолдану Мемлекет басшысының ішкі істер органдарының алдына қойған басты міндеттерінің бірі. Бұл бағытта ол мүдделі тараптарды бірлесе жұмыс істеуге шақырды.