Ынтымақтастықтың тиімді бағыттары талқыланды
Мемлекет басшысы Конго Республикасы президентінің стратегиялық мәселелер және халықаралық ынтымақтастық жөніндегі жеке өкілі Франсуаза Жолиді қабылдады.
Президент Қасым-Жомарт Тоқаев Франсуаза Жолиге ілтипат білдіре отырып, оның бұл сапары Қазақстан мен Конго Республикасы арасындағы өзара тиімді байланыстарды дамытуға деген шынайы ниеттің белгісі саналатынын атап өтті.
Мемлекет басшысы биыл елдеріміз дипломатиялық қатынастардың 25 жылдығын атап өтетініне тоқталып, Конго Республикасымен ықпалдастықты нығайтуға дайын екенін айтты.
Өз кезегінде Франсуаза Жоли құрмет көрсеткені үшін Қасым-Жомарт Тоқаевқа алғыс білдіріп, өз елінің президенті Дени Сассу-Нгессоның ізгі тілегін жеткізді.
Кездесуде Конго Республикасы президентінің Қазақстанға жасайтын алдағы сапарына қатысты мәселелер, сондай-ақ, екіжақты ынтымақтастықтың перспективті бағыттары талқыланды.