Сайлаушылар тiзiмдеріне енгiзу

Сайлаушылардың тізімдерін әкімшілік-аумақтық бірлік шегінде әрбір сайлау округі бойынша дауыс беруді ескере отырып, тұрғылықты жері бойынша тұрақты тіркеу негізінде жергілікті атқарушы органдар (әкімдіктер) жасайды.

Сайлаушылар тізімдеріне белсенді сайлау құқығы бар және тиісті сайлау учаскелерінің аумағында тұрғылықты жері бойынша тіркелген Республика азаматтары енгізіледі.

Уақытша тіркелген азаматтар сайлаушылар тізімдеріне өздері берген өтініш негізінде дауыс беру күніне дейін отыз күннен кешіктірмей немесе 2023 жылғы 17 ақпанға дейін енгізіледі.

Өтініш келіп түскен кезде әкімдік азаматты ол дауыс беретін учаскенің сайлаушылар тізіміне енгізуді және оны тіркелген жері бойынша тізімнен  шығаруды ұйымдастырады.

Осы құқықты:

- дауыс беру күні тіркелген жерінде болмайтынын алдын ала білген азаматтар;

- басқа қаладан келген, арнаулы орта және жоғары оқу орындарында оқитын студенттер;

- вахталық әдіспен жұмыс істейтін азаматтар пайдалана алады.

Азамат сайлаушылардың бір  тізіміне ғана енгізіле алады.

Тиісті әкімдіктің интернет-ресурсы немесе Call-орталығы арқылы сайлаушылар тізіміне енгізілгеніңізді тексере аласыз немесе сайлаушылар тізіміне енгізілуіңіз үшін қайда жүгінуіңіз керек екенін біле аласыз.

2023 жылғы 4 наурыздан бастап сайлаушыларға нақты сайлау учаскесінде сайлаушылар тізіміндегі өзі туралы деректерді тексеру мүмкіндігі берілетін болады.

Сондай-ақ сайлаушыларға ыңғайлы болу үшін электрондық сервистер арқылы сайлау учаскесі туралы хабардар ету ұйымдастырылады.