Бейбіт күннің батырларына құрмет көрсетілді
Ерлік жасау екінің бірінің қолынан келе бермейді. Ал, Түркістан өңірінде өз басын қатерге тігіп, өзгенің өмірін сақтап қалған азаматтар бар. Апта ортасында облыс әкімі Өмірзақ Шөкеев бейбіт күннің батырларын қабылдап, оларға лайықты құрмет көрсетті.
– Бүгін біз шын мәнінде нағыз патриот, нағыз қаһармандармен жүздесіп отырмыз. Сіздер қазіргі жастар үшін үлгісіздер. Олар отаншылдықтың не екенін сіздерден үйренеді.
Жалпы Түркістан облысында патриот азаматтар аз емес. Арыс апаты мен Мақтааралдағы су тасқынында облысымыздың ерікті жастары, патриоттары күндіз-түні елге қызмет етті. Оны көпшілік жақсы біледі. Мұның бәрі өңір тұрғындарының мықтылығын, елге жанашырлығын көрсетеді. Сіздер тұрғындарды өрттен, апаттан құтқарып, ерлік жасадыңыздар. Бейбіт күннің батыры атанып жүрсіздер. Қасиетті байрағымызды оттан алып шыққан бауырымызға да рахмет! Осындай азаматтарды елге танытып, насихаттауымыз керек. Біз сіздермен мақтанамыз, — деді Өмірзақ Шөкеев.
Батылдық пен батырлықтың үлгісін көрсеткен Түркістан облысының азаматтарын облыс әкімі «Түркістан облысына сіңірген еңбегі үшін» төсбелгісімен марапаттады. Олардың бірі – күні кеше ғана ерлігінің арқасында елге танылған Қансейіт Мұхаммед. Оның отаншыл болмысын күллі ел көрді. Сайрам аудандық халықты жұмыспен қамту орталығының қызметкері Ақсукент ауылында орналасқан әрі өзі жұмыс істейтін ғимаратта болған өрт кезінде шатыр үстіндегі Мемлекеттік Туды оттан аман алып шыққан болатын.
Хайруллаев Аян Рысбекұлы – Жетісай аудандық полиция бөлімінің миграция бөлімшесінің басшысы. Ол өзіне төнген қауіпке қарамай, бейтаныс кейуананы өрттің ортасынан аман алып шыққан.
Нұрғали Керімбеков – Кентау қаласындағы №12 өрт сөндіру бөлімінің бөлімше командирі, азаматтық қорғау аға сержанты. Өз ісінің шебері су құбырына құлап кеткен 2 жастағы баланы ажалдан құтқарып қалды.
Батырлардың бірі Рысбек Мейірбек Нұржігітұлы – Қазығұрт ауданының тұрғыны. Ол әжетханаға түсіп кеткен 1 жастағы баланы құтқарып алып шығып, көптің сүйіспеншілігіне бөленді.
Батыл азаматтар өңір басшысының ілтипатына ризашылық білдіріп, қоғамның дамуына қызмет етуге дайын екендіктерін жеткізді.