Ел жастардан тың бастамалар күтеді

11 шілдеде Ақмола облысының Зеренді ауылында «AMANAT» партиясы жастар қанатының кезектен тыс VI съезі өткені белгілі. Төрт күнге жоспарланған шараға еліміздің барлық өңірінен 350 делегат қатысты. Олардың ішінде Түркістан облысынан 12 делегат бар.

Ашық табиғат аясында ұйымдастырылған «Net Working» форматындағы шараның мақсат-міндеті партиядағы жастар қанатының жұмысына тың серпін беретін өзгерістер мен үлкен бетбұрысқа бағытталған. 

Мемлекет басшысы Қасым-Жомарт Тоқаев бейнежазба арқылы «AMANAT» жастар қанатының кезектен тыс VI съезіне қатысушы делегаттарға құттықтау сөз арнап, ел жастарына арнайы үндеу жолдады. Президент өз үндеуінде Жаңа Қазақстанның жастары айрықша түсінуге тиіс үш маңызды бағытты атады. Біріншіден, Мемлекет басшысының айтуынша, болашақтың кілті цифрлық технология мен инновацияда. Көзі ашық, көкірегі ояу азаматтар елді алға бастайды. Сондықтан бірнеше тіл біліп, түрлі кәсіп игеру жастардың қолынан келеді. Білімді әрі білікті өрендер ғана биік мақсатқа жете алады. Елге тірек болу – әрбір жастың мұраты. Ел жастардан тың бастамалар және озық идеялар күтеді.

Екіншіден, жастар адал еңбекті бағалап, рухы биік, санасы сергек болуы тиіс. Жаңа заманның жақсы қасиеттерін бойға сіңіре отырып, жаһанданудың жағымсыз әсерлерін де естен шығармау керек. Мемлекеттік мүдде бәрінен биік тұруы керек екенін айта келіп, Президент әрбір жасты ана тілін, ата дәстүрін, төл тарихын білуге үндеді. Үшіншіден, Қасым-Жомарт Тоқаев «Туған елге құрмет жалынды сөзден емес, жасампаз істен көрінетінін, алдына мақсат қойған азамат нағыз мемлекетшіл тұлғаға айналатынын» ерекше атап өтті. Әркім қоғам алдындағы жауапкершілігін терең сезіну керек. Осылайша Президент Жаңа Қазақстанның жастары айрықша түсінуге тиіс үш маңызды бағыт – терең білім, еңбекқорлық және отаншылдық қасиет екендігін атап айтты. Аға буынның жастарға зор үміт артатынын, оны жастардың ақтайтынына сенім білдіріп, съезд жұмысына табыс тіледі.

ҚР Президенті Қасым-Жомарт Тоқаев өзінің «Жаңа Қазақстан: жаңару мен жаңғыру жолы» атты Жолдауында «Біз адамдардың энергиясына, таланты мен еңбекқорлығына арқа сүйейміз. Әрбір адамзаттың өзін-өзі дамытып, өз ойын жүзеге асыруы үшін барынша қолайлы жағдай жасаймыз. Тек осылай ғана біз халқымыздың жасампаздық әлеуетін арттыра аламыз» деп атап өткен болатын.

Съезд барысында партияның жастар қанаты ұйымына жаңа атау беру қарастырылды.  Қазақстандық спортшы, мини-футболдан Еуропа чемпионатының үздік сұрмергені Біржан Оразов ұйымға «Жастар рухы» атауын беруді ұсынды. «Жаңа Қазақстанды өз Отанын сүйетін, білімді, парасатты, дарынды, рухты жастар құратыны сөзсіз. Сондықтан бүгінгі делегаттарға партияның жастар қанатының атауын «Жастар рухы» деп өзгертсек деген ұсынысым бар» деді Біржан Оразов.

Мәжіліс төрағасы Ерлан Қошанов және съезд делегаттары да жастар қанатының жаңа атауы туралы ұсынысты бірауыздан қолдады. Осылайша еліміздегі 105 мың адамды құрайтын ең ірі жастар ұйымы «Жастар рухы» деп аталды. Партияның жастар қанатын жаңарту тек атауын өзгертумен шектелмейді. Іс-шарада жастар ұйымын трансформациялау бағдарламасы ұсынылды.

Жастар форумының соңғы күні партияның атқарушы хатшысы Асхат Оралов төрт күн бойы белсенді жұмыс істегені үшін барлық өңірден келген делегаттарға алғыс айтып, естелік сертификаттар табыстады. «Мемлекет басшысы Қасым-Жомарт Тоқаев съезд делегаттарына арнаған үндеуінде Отанға қажет әрі пайдалы болуға ұмтылу – әрбір жас адамның мақсаты болуы тиіс екенін атап өтті. Бұл іс-шара ұл-қыздардың бірлігі мен ынтымағын айқындады. «Жастар рухы» жастар үшін толыққанды әлеуметтік лифт болатынына кәміл сенемін» деді «AMANAT» партиясының атқарушы хатшысы.

Пленарлық отырыстан бөлек, өте мазмұнды бағдарламалар болды. Яғни ақпараттық тренингтер, семинарлар, қызықты мәдени бағдарламалар ұйымдастырылды. Жан-жақтан жиналған жастар тәжірибе алмасып, өз идеяларымен бөлісіп қана қоймай, әріптестерінің ұсыныстарын талқылады. Съезге қатысып қайтқан делегаттар алға қойған міндеттерді іске асыру үшін тың күш-қуат пен ерекше шабыт алғандарын айтады.

Съезді қорытындылай келе, «AMANAT» партиясының төрағасы Ерлан Қошанов Жаңа Қазақстан болашақ жастардың игілігі үшін құрылып жатқанын атап өтті.

«Бұл реформалардың мәні неде? Сіздердің әрқайсысыңызға – еліміздің саяси өміріне, бизнеске, басқа да қоғамдағы маңызды мәселелерге еркін араласу үшін тең мүмкіндік беру. Бір сөзбен айтқанда, біздің жастарымыз келешекте әділетті де ашық қоғамы бар қуатты Қазақстанда өмір сүрулері керек. Президент бастамасымен осы өзгерістердің барлығы Конституциямызға енгізілді, шегеленді, заңдастырылды. Ендігі кезекте осы реформаларды іске асыруда – алдыңғы қатарда жастар, әрине, сіздердің болуларыңыз өте маңызды» деді Ерлан Қошанов.