Қазақстан мен Өзбекстан саудадағы кедергілерді жою үшін жұмыс тобын құрмақ
Өзара саудадағы кедергілерді жою үшін Өзбекстан мен Қазақстан арнайы жұмыс тобын құрмақ. Сонымен қатар бірлескен сыртқы сауда компаниясы арқылы онлайн сауда алаңын құру жоспарын құру да жоспарға енгізілді. Kazinform бұл туралы Uza.uz-ге сілтеме жасап хабарлайды.
Жуырда ӨР Инвестициялар, индустрия және сауда министрі Лазиз Қудратов пен Сауда және интеграция министрі Арман Шаққалиевтің кездесуі өтті. Онда Қазақстан Президенті Қасым-Жомарт Тоқаевтың Өзбекстанға сапары аясында қол қойылған инвестициялық және сауда келісімдерін іске асыру бойынша атқарылып жатқан жұмыс, екі ел арасындағы өнеркәсіптік ынтымақтастықты одан әрі дамыту перспективалары және қазіргі жобаларды жүзеге асырудың өзекті мәселелері талқыланды.
«Өзара сауда көлемінің ұлғаюы сөз болды. Кейінгі 6 жылда сауда көлемі 2,5 есеге жуық өсіп, 2016 жылғы 1,9 миллиард доллардан 2023 жылы 4,6 миллиард долларға дейін ұлғайды. Бұл ретте пайдаланылмай жатқан мүмкіндіктер бар екенін айта келе, тараптар алдағы жылдары тауар айналымын 10 миллиард долларға жеткізу үшін бірқатар шараны жүзеге асыруға келісті. Атап айтқанда, өзара саудадағы кедергілерді жою бойынша бірлескен жұмыс тобы құрылатын болды. Сондай-ақ, тараптар екі елдің нарығында кең ауқымды тауарларды сатуға арналған онлайн-сауда алаңын қамтитын «UzKazTrade» бірлескен сыртқы сауда компаниясының қызметіне қолдау көрсетуге дайын екендіктерін білдірді» делінген хабарламада.
«Орталық Азия» халықаралық өнеркәсіптік кооперация орталығын ұйымдастырудың практикалық аспектілерін ескере отырып, өнеркәсіптік кооперацияны дамытуға қатысты сындарлы пікірлер айтылып, орталықты құру мен пайдалануға беруді жеделдету бойынша бірлескен шаралар қабылдау туралы келісімге қол жеткізілді.
Кездесу соңында тараптар екіжақты қарым-қатынастарды одан әрі дамытуды жақтайтындықтарын қуаттап, қол жеткізілген уағдаластықтарды жедел жүзеге асыруға жауапты басшыларға тапсырма берді.