«Өліара кезеңі» туралы білесіз бе?

Халқымыз табиғат тылсымын ерте заманнан-ақ түсініп, оны өзінің тұрмыс-тіршілігіне арқау ете білген. Солардың бірі – халықтың ауа райын болжау тәсілдері. Жылдың әр айы мен тоқсанында болатын ауа райындағы табиғат өзгерістері мен құбылыстарын дала халқы әр кез назарында ұстап, оған ат қойып, айдар тағып, баға беріп отырған.

Қазіргі уақыт «Өліара» кезеңі болып саналады. Өліара – ескі ай бітіп, жаңа ай туғанға дейінгі аралық. Аспанда ай көрінбейтін кез. Айдың ортасына таман 9-15 аралығында әрқалай аспанда 3-4 күн ай мүлдем болмайды. Өліарадағы ауа райы, туар ай да қайталанады деген ұғым қалыптасқан. «Өліарада жауын-шашын болса, туар ай да жауынды-шашынды болады» дейді халқымыз. Қазақ халқы ауа райына қатысты болжамдарды өмірден алған. «Өліара», «тоғыста» күн бұзылатынын алдын-ала білген. Сондықтан да бұл күндері қолшатырыңызды алып жүруді ұмытпаңыз.

Бұрындары қазақтың тыйым салу салты бойынша бұл аралықта жолға шығуға болмайды, жаңа іс бастамайды, түнде далаға шықпайды, қыдырмайды себебі жын-шайтанның жер бетіне шығатын кезеңі.

Ал, сіз «Өлара» кезеңінде ауа райында тағы қандай өзгерістер байқадыңыз? Білгенімізді ортаға сала отырайық.

К.Мұса, Әдет-ғұрып және салт-дәстүр орталығының қызметкері.