Ауыз су мәселесін талқылады
Түркістан облыстық мәслихатының жұмыс жоспарына сәйкес 2024 жылғы I тоқсанда «Түркістан облысының елді мекендерін ауыз сумен қамтамасыз ету туралы» мәселені қарау жоспарланған. Осыған орай арнайы құрылған уақытша депутаттық комиссия мәжіліс өткізді.
Жиынды облыстық мәслихаттың кәсіпкерлік, құрылыс, инфрақұрылымды дамыту, жер қатынастары және табиғатты пайдалану мәселелері жөніндегі тұрақты комиссиясының төрағасы С.Көшенов жүргізді.
Комиссия отырысына Түркістан облыстық мәслихатының төрағасы Н.Әбішов, облыс әкімінің бірінші орынбасары З.Жолдасов, облыстық энергетика және тұрғын үй-коммуналдық шаруашылық басқармасының басшысы Р. Мұздыбеков, «Нұра топтық су құбыры» республикалық мемлекеттік кәсіпорны Оңтүстік ауыз су филиалының директоры Е.Есіркепов және уақытша депутаттық комиссия мүшелері қатысты.
Күн тәртібіндегі мәселе бойынша облыстық энергетика және тұрғын үй-коммуналдық шаруашылық басқармасының басшысы Р. Мұздыбеков, «Нұра топтық су құбыры» республикалық мемлекеттік кәсіпорны Оңтүстік ауыз су филиалының директоры Е.Есіркепов баяндама жасады.
Р. Мұздыбеков өз баяндамасында 2024 жылы 47 нысанның құрылысына бюджеттен 13,3 млрд. теңге (Ұлттық қордан – 10,8 млрд. теңге, республикалық бюджеттен – 1,2 млрд. теңге, облыстық бюджеттен – 1,3 млрд. теңге.) бөлініп, ағымдағы жылы 37 нысан аяқталатындығын, ал, қалған 10 нысан 2025 жылға өтпелі екендігін жеткізді. Нәтижесінде, 14 елді мекен (Сарыағаш – 2, Отырар – 1, Төлеби – 1, Келес – 5, Созақ – 4, Қазығұрт – 1) ауыз сумен қамтылып, 13 елді мекеннің (Бәйдібек – 1, Ары – 1, Сарыағаш – 1, Төлеби – 4, Жетісай – 2, Мақтаарал – 2, Түлкібас – 1, Шардара – 1) тозығы жеткен су құбырлары қайта жаңартылмақ.
Сонымен қатар, басқарма басшысының айтуынша, 8 елді мекенге (Сарыағаш–3, Келес–2, Мақтаарал–1, Шардара–2) кешенді блок-модуль қондырғысы орнатылатын болады.
Биыл жоспарға сәйкес 832 елді мекеннің 761-і (7 қала, 754 ауылдық елді мекен) ауыз сумен қамтамасыз етілмек.
Жиын барысында депутаттар өздерін толғандырып жүрген мәселелер бойынша пікір алмасты.
Жиын соңында комиссия төрағасы С.Көшенов келесі отырысқа ұсыныстар енгізу үшін депутаттарға тиісті мамандармен аудан, қалаларға бірге барып, зерделеу жұмыстарын жүргізуді ұсынды.
Түркістан облыстық мәслихаты.