САЯБАҚТА «OTBASY FEST» ӨТТІ

Шымкент қалалық отбасы, балалар және жастар істері жөніндегі басқарма мен «Жастар ресурстық орталығының» ұйымдастыруымен Шымкентте «OTBASY FEST» фестивалі өтті. Оған балалар үйлерінен 100-ге тарта жасөспірім қатысып, өз өнерлерін ортаға салды.

Фестивальдің негізгі мақсаты – отбасы институтын нығайту мен неке және отбасы құндылықтарын насихаттау. Орталық саябақта өткен фестивальге 500-ге тарта адам қатысты. Онда қала тұрғындары мен олардың отбасы мүшелеріне арналған секциялар ұйымдастырылған. Шарада кеңес беру бұрышы, спорттық жаттығулар, дұрыс тамақтану, балаларға арналған мультфильмдер көрсетіліп, конкурстар, ұтыс ойындары, тамақ фестивалі, концерттік бағдарламалар өтті. Ұрпақтар сабақтастығын ұлттық дәстүрдегі қазақстандық отбасының үлгісін насихаттайтын, сыбайлас жемқорлыққа қарсы мәдениетті қалыптастыру мен парасаттылық принциптерін енгізу мәселелері қамтылды.

– Мұндай шара қаламызда екінші рет ұйымдастырылып отыр. Өткен жылы біз негізінен кішкентай нәрестелерге сыйлық жасасақ, биылғы фестиваль мектеп оқушыларына арналып отыр. Аталған шара бір күн бойына ұйымдастырылады. Акция барысында балалар үйіндегі жасөспірімдердің талантын шыңдау мақсатында концерттік бағдарламалар өткізіледі. Сонымен қатар, цирк пен қуыршақ театрының әртістері өз өнерлерін көрсетті, – дейді Шымкент қалалық Жастар ресурстық орталығының бөлім басшысы Динара Оралова.

Іс-шараға қатысқан отбасы мүшелері мен жетім және ата-анасының қамқорлығынсыз қалған отбасының балалары белсенділік танытты. Фестиваль кезінде ата-аналар мен балаларға қажетті қызмет түрлері көрсетілді. Онда білікті мамандар кеңес беріп, арнайы емтихандар өткізілді. Тұрғындарға заңгерлерден кеңес алу мүмкіндіктері де қарастырылған. Визаж, шаштараз, тырнақ әрлеушілері де өз қызметтерін ұсынды. Сондай-ақ, йога, би, ашық ауада флэшмоб, концерттік бағдарламалар өтті. Балалар мен ересектер арасында сән көрсетілімі, көңілді конкурстар мен ойындар жалғасын тапты.

Жеңімпаздарға түрлі сыйлықтар таратылып, барлық отбасыға арналған тимбилдингтер, әртүрлі шоу түрлері ұйымдастырылды. Атап айтқанда, айна, сабын, қағаз, трансформаторлық шоулары өтті. Трамплиндер мен аквагримерлер, қуыршақ театры мен аспаздық студия және тағы басқалары да бар.

Сондай-ақ, қатысушыларға балмұздақтар мен тәттілер үлестіріліп. №3 және №4 балалар үйі тәрбиеленушілеріне «Гауһар тас» тігін фабрикасының демеушілігімен жаңа оқу жылына мектеп формалары таратылды.

Ж.ШАЛАБАЕВА.