Көпқабатты үйлер газға қосылуға дайын

Кентау қаласындағы Ш.Уәлиханов көшесінде орналасқан он көпқабатты 60 пәтерлі тұрғын үйлер газға қосылуға дайын. Қала әкімі Рашид Аюповтың қатысуымен көпқабатты тұрғын үйлердің газ тарату шкафтарын газбен толтыру жұмыстары іске қосылды. Енді әр пәтер тұрғындары «КазТрансГаз Аймақ» АҚ «Кентау Газ шаруашылығына» барып, дербес шот ашу арқылы үйлерін газға қоса алады. 

– Газды құбырларын жасаған мердігер жеке-жеке қосады. Ол үшін әр пәтер тұрғындары үйлерінде болулары керек. Газдың пеші дайын болуы қажет. Мамандар әбден тексеріп, қосуға дайын деген кезде кезең-кезеңімен пәтерлерді газға қосамыз, – деді Түркістан облысы бойынша «КазТрансГаз Аймақ» АҚ филиалының директоры Ержан Балабеков. 

Қазіргі таңда Кентау қаласы табиғи газбен қамтылып, қала аумағында тұтынушы санын көбейту жұмыстары жүргізілуде, «КазТрансГаз Аймақ» АҚ-на 2063 абонент техникалық шарт алу үшін өтініш берген. Қалада 200-ден аса абонент газбен қамтылған.

– Өте қуаныштымыз. Үйіміздің маңайына газ келді. Қала басшыларына рахмет! Айтқан уәделерін орындады. Енді құжаттарымызды дайындасақ, үйімізге газ қосылады. Жолымыз да салынды, — дейді Ш.Уәлиханов көшесінің тұрғыны Орынкүл Жолдыбай.

Жалпы қаланы табиғи газбен қамтудың ІІ кезеңі барысында нысандарды қысыммен тексеру жұмыстары жүргізілуде. Оны биыл тамыз айының соңында аяқтау жоспарланған.