Мақтаның шығымы да жақсы, бағасы да жақсы
Түркістан облысында агроөнеркәсіп саласына 30 млрд. теңгеге жуық инвестиция тартылған. Бұл бағытта Қазығұрт, Ордабасы, Сарыағаш және Бәйдібек аудандары көш бастап тұр. Инвестицияның басым бөлігі тамақ өндірісіне бағытталған. Облыстағы күзгі астық жинау жұмыстары мен агроөнеркәсіптік кешенін дамыту саласында атқарылған жұмыстардың орындалуы облыс әкімі Өмірзақ Шөкеевтің төрағалығымен өткен лездемелік мәжілістің күн тәртібіне қойылды.
Күзгі астық жинау науқаны нәтижелі өтуде. Бүгінге дейін 3 млн. тонна көкөніс, бақша, картоп өнімдері жиналды. Жыл соңына дейін күзгі өнімнің жалпы көлемі 3,5 млн. тоннаға жеткізіледі. Биыл ауыл шаруашылығы дақылдары 842,4 мың гектарға егілді.
Өңірдегі 18 мақта өңдеу зауытының 206 мақта қабылдау бекеті шитті мақтаның 1 келісін 250 теңгеден қабылдауда. Шаруалар әр гектардан орта есеппен 30-35 центнерден өнім алып, 500 мың теңгеге дейін пайда таппақ. Жоспар бойынша 250 мың тонна шитті мақта жинау жоспарланып отыр. Биылғы қуаңшылыққа қарамастан, Өзбекстан елімен жасалған екіжақты ынтымақтастық туралы келісімнің нәтижесінде егістік алқаптар трансшекаралық Достық каналынан келетін ағын сумен тиісті деңгейде қамтамасыз етілді. Тыңайтқыш пен тұқымдық шиттен таршылық көрмей, жеңілдетілген бағадағы жанар-жағармай да жеткілікті болды.
«Биыл мақтаның өнімі жақсы, бағасы да жақсы. Шаруаларымыздың табысының артатыны қуантады. Оның үстіне биыл егістік алқаптарымыз да бұрын болмаған ағын сумен қамтамасыз етілді» деді облыс әкімі.
Сонымен қатар, облыс әкімінің тапсырмасымен ағын суды көбейту мақсатында су арналары механикалық тазалаудан өтуде. Бұл өз кезегінде суармалы жерлердің ағын сумен қамтамасыз етілуін жақсартып, жер асты суын төмендетіп, егістіктің тұздануының алдын алды. Мақта дақылының өнімділігі артады.
Сонымен бірге, отырыста облыстағы мүлік иелері бірлестігі бойынша соңғы мәліметтер баяндалды. Түркістан облысында 1482 көппәтерлі тұрғын үй бар. Оның ішінде, басқару органдарын құруды қажет ететіні –1348, қалған 127 КПТҮ коммуналдық меншікте. Республикалық деңгейде жүйелі жұмысты ұйымдастыру үшін «Easy project» ақпараттық жүйесі құрылды, оған көппәтерлі тұрғын үйлер туралы барлық ақпарат жүктелуі тиіс. Облыстың барлық көппәтерлі үйлері осы жүйеге енгізіледі. Кондоминиум нысандарын басқарудың жаңа бағытына көшу жөніндегі жұмыстарды қазан айының соңына дейін аяқтау көзделген.