Өңіріміз санаққа қатысқандар саны бойынша алда келеді
Түркістан облысы бойынша санаққа қатысқандар саны – 440 618. Жалпы Түркістан облысында 2 061 562 адам тұрады. Бұл көрсеткіш Қазақстан бойынша халық саны жағынан Түркістан облысының 1-орында екендігін көрсетеді.
Халық санағы ел аумағында тұратын халық санының ресми есебін жүргізуге мүмкіндік береді. Жалпыұлттық санақ – ең шынайы, сенімді ақпарат көзі. Өйткені, ол азаматтардың жеке сауалнамаларына негізделген. Халық санағына қатысатын Түркістан облысының тұрғындары өздері туралы ақпарат беріп, әлеуметтік бағдарламаларды әзірлеуге қатысады.
Мысалы, жұмыссыздардың жауаптары еңбек нарығын зерттеуге және қажет болған жерде жаңа жұмыс орындарын құруға мүмкіндік береді. Балалар саны туралы мәліметтер мектептер, балабақшалар және басқа да балалар мекемелерін салу жоспарларын түзетуге көмектеседі. Тұрғылықты жері туралы деректер жолдар мен басқа да қажетті инфрақұрылым құрылысын жоспарлауға мүмкіндік береді.
Халық санағының қорытындысы өткен 10 жыл ішінде халықтың демографиялық және әлеуметтік-экономикалық дамуында болған экономикалық, демографиялық және әлеуметтік өзгерістерді көрсетеді. Санақ облыс, қала және ауыл халқының санындағы, жынысы мен жасына, неке жағдайына, ұлттық құрамына, азаматтығына, діни сеніміне, білім деңгейіне, тілдерді меңгеруіне, үй шаруашылықтарының саны мен мөлшеріне, тұрғын үй жағдайларына және басқа да сапалық және сандық белгілеріне қарай өзгерістерді анықтауға мүмкіндік береді.
Халық санағының нәтижелері үй шаруашылықтарының жағдайын, неке-отбасы қатынастарын жақсарту, мүмкіндігі шектеулі адамдардың өмірін, халықтың тұрғын үй жағдайларын жақсарту, сондай-ақ білім беру, жұмыспен қамту, туу және көші-қон мәселелері бойынша шешімдер қабылдау жөніндегі мемлекеттік бағдарламаларды әзірлеу үшін қажет.
Тәуелсіз Қазақстанда алғашқы ұлттық халық санағы 1999 жылы, ал, екіншісі 2009 жылы өтті. Ауқымды шараны Қазақстан Республикасы Статистика агенттігі ұйымдастырды. 2018 жылдың сәуір айында Қазақстан халқының пилоттық санағы өтті. COVID-19 пандемиясына байланысты Қазақстан Республикасында 2020 жылға жоспарланған кезекті ұлттық халық санағын өткізу 2021 жылға ауыстырылғаны белгілі.