«Батыр әке» жылыжай ісін өркендетті

Келес ауданында 9 баланы жалғыз асырап отырған ер кісі тұрады. Қанәділ Жұмабаев есімді азамат үйіргелік 15 сотық жылыжайына қызанақ, қияр егіп балаларының несібесін алып отыр. Балаларының үлкені 20 жастағы студент болса, ал, кішісі 4 жаста. Жалпы, 6 ұл, 3 қызды тәрбиелеп отырған «батыр әкені» бүгінгі күннің қаһарманы деуге келеді. Кәсіпкерлік салаға бет бұрған ол мемлекет тарапынан берілген көмекті місе тұтып, үй іргесінен 15 сотық жерге жылыжай тұрғызды. Нәтижесінде, ерте көктемнен қызанақ, қияр өнімін егіп, күзге қарай жерін жыртып, қырыққабаттың көшеттерін сатып, пайда тапты. Қолы қалт еткенде, ел арасында құрылыс жұмыстарына шығып, қосымша табысын еселеуде.

«Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған» бағдарламасы аясында Біртілек ауылдық округіндегі «Алтын ай» балабақшасына күзетші болып тұрақты жұмысқа тартылған. «Жылыжайдан бала-шағаның бұйырған несібесін алып отырмыз. Балалар көмектеседі, көмектескені маған, үйренгені өздеріне жақсы ғой. Ертең үлкен болғанда қиналмайды. Одан қалса, ауылдың ішіндегі құрылыс жұмыстарына араласамын. Нақтырақ айтсам, үйдің төбесін жабуды қосымша кәсіп еткенмін» дейді көп балалы әке Қанәділ Пернеханұлы.

«Оңтүстік»-ақпарат.