Үгіт-насихат жұмыстары қарқын алды
Үгіт-насихат жұмыстары қарқын алды
ҚР Президенттігіне
кандидат Қ.Тоқаевтың Түркістан облыстық қоғамдық штаб мүшелері мен сенімді
өкілдерi еңбек ұжымдарымен және түрлі сала қызметкерлерімен кездесуде. Штаб
басшысы Ұласбек Сәдібеков Сарыағаш ауданы, Ақжар ауылдық округінде орналасқан
«AgroFood Kazakhstan» ЖШС-нің еңбек ұжымымен кездесіп, ҚР Президенттігіне
кандидат Қ.Тоқаевтың сайлауалды бағдарламасын кеңінен түсіндірді.
Жиында облыстық
мәслихат депутаты Алмас Салимов, «AgroFood Kazakhstan» ЖШС құрылтайшысы Құдияр
Артықұлы және ұжым атынан сөз алған Нарман Хинизов бүгінге дейін еліміздегі
көшбасшы партияның көптеген игі істерге ұйытқы болғандығын жеткізіп, алдағы
уақытта да үлкен істерді атқаратындығына сенім білдірді.
***
Сонымен қатар
аталған қоғамдық штаб мүшелері Түркістан облысындағы этномәдени бірлестіктердің
өкілдерімен кездесті. Түркістан гуманитарлық-техникалық колледжінде өткен
жиында облыстық штаб басшысы Ұласбек Сәдібеков Қасым-Жомарт Кемелұлының
сайлауалды бағдарламасындағы айқын басымдықтар туралы айтып өтті.
Басқосуда облыстық
«Южный Казахстан» газетінің бас редакторы, облыстық славян этномәдени
бірлестігінің төрайымы Марина Лимаренко, «Вайнах» шешен-ингуш мәдени
бірлестігінің төрағасы Хасан Бациев, облыстық өзбек этномәдени орталығы
жанындағы жастар қанатының төрағасы Әлішер Сатыбалдиев «Nur Otan» партиясының
бастамасымен ел дамуы жолында игілікті істер жүзеге асып жатқандығын айтып,
ойларын ортаға салды.
***
Жуырда ҚР
Президенттігіне кандидат, «Ауыл» халықтық-демократиялық партиясының өкілі
Төлеутай Рахымбеков сайлауды бақылау жөніндегі «Аманат» азаматтық
платформасының өкілдерімен кездесті. Кездесуде қоғамдық бірлестіктің жетекшісі
Мұсағали Дуанбеков ұйымның концепциясы, мақсаты және орындалуы тиіс міндеттері
туралы әңгімеледі.
Өз кезегінде
Т.Рахымбеков елдің барлық өңірлерінде өзінің сайлауалды штабы жасақталғанын
және «Ауыл» партиясының 7700-ден астам өкілі сайлауға бақылаушы ретінде
қатысатынын айтты. Сондай-ақ, өзінің сайлауалды тұғырнамасының негізгі
бағыттарымен таныстырды.
***
Ордабасы аудандық
мәдениет үйінде Қазақстан Кәсіподақтар федерациясы ұсынған кандидат Амангелді
Таспиховтың сайлауалды штабы мүшелері мен сенімді өкілдері тұрғындармен
кездесті.
Білім, мәдениет
және спорт саласы мамандары мен бюджеттік сала қызметкерлері, барлығы 250
сайлаушы қатысқан басқосуда кандидаттың Шымкент қаласы және Түркістан облысы
бойынша штабының жетекшісі Берік Бекжанов сөз сөйледі. Ол көпшілікті
А.Таспиховтың сайлауалды платформасымен таныстыра отырып, алдағы сайлаудың
тарихи маңызына да тоқталды.
А.Сайлауұлы.