Жерлестерiмiзден жеңiс күтемiз

Желтоқсан 08 / 2018

 

8-9 желтоқсан күндері Алматы қаласындағы Балуан Шолақ атындағы Спорт сарайында жекпе-жек және күш қолданылатын спорт түрлері бойынша конфедерация кубогінің финалдық кезеңі өтеді. Түркістан облысының командасы бірнеше спорт түрі бойынша ақтық кезеңге өтті.

 

Құрамында Қайрат Ералиев, Жомарт Ержан, Олжас Байниязов, Бек Нұрмағанбет, Бекдәулет Ибрагимов секілді былғары қолғап шеберлері бар облыстың бокс құрамасынан жанкүйерлер тек жеңіс күтеді. Жақында Ақтау қаласында бокстан өткен ел чемпионатында Түркістан облысының боксшылары жалпыкомандалық есепте бірінші орынды жеңіп алған еді. Енді олар жартылай финалдық сында Қарағанды облысының боксшыларымен күш сынасады. Жартылай финалдық екінші жұпты Астана қаласы мен Маңғыстау облысының боксшылары құрап отыр.

Қанат Тұрғараев баптайтын облыстың еркін күрес шеберлері де 25 млн. теңге сыйақыдан үмітті. Құрамында Нұрболат Әбдуәлиев (57 келі), Бағдат Сайранбай (65 келі), Фади Аббасов (74 келі), Сайд Аббазов (86 келі), Мәлітхан Ташбол (97 келі), Жантас Дәрібай (125 келі), Бақдәулет Өсербай (125 келіден жоғары) сынды білектілер бар балуандарымыз Астана құрамасымен финалдық жолдаманы сарапқа салмақ.

Сондай-ақ, таэквондошыларымыз да конфедерация кубогі үшін таласады. Іріктеу сындарынан іркілмей өткен жерлестеріміз жеңіске жету үшін Павлодар облысы мен Алматы қаласының таэквондошыларымен күш сынасады.

Е.Қожахметұлы.

Бұл материалмен бөлісіңіз

Бұл материалда пікір жоқ