«Ордабасы» қоладан үміт үзді

Қараша 03 / 2018

 

Футболдан ел чемпионатында Шымкент қаласының намысын қорғайтын «Ордабасы» клубы қола жүлдеден үмітін үзді. Шымкенттік клуб 31-турда өз алаңында қарағандылық «Шахтерді» қабылдап, тең тарқасты. Шымкенттік клуб әзірге 40 ұпай еншілеп, 6-орында тұр. Үшінші орында тұрған «Тобылдың» 10 ұпайы артық. Осылайша маусым басында үздік үштіктен көрінуді алдына мақсат қойған «Ордабасы» жүлдеден қағылды.

 

Былтырғы чемпионатта қола жүлде алған «Ордабасы» клубы биыл төмен нәтиже көрсетіп отыр. Олар былтыр өз тарихында тұңғыш рет жүлдегерлер сапынан көрінген-ді. Неге екені белгісіз, асыға күткен сол жүлдеге жеткізген білікті бапкер Алексей Петрушинге клуб басшылығы есікті нұсқады. Оның орнына Болгариядан аттай қалап Георги Дерменжиевті алдырған.

Бапкерлік құрамның ауысуы командаға кері әсерін тигізді. Ойыншылар бірінен соң бірі жарақат алып, команда ел чемпионатында жеңіс дегеннің не екенін ұмыта бастады. Клуб басшылығы болгар бапкерін ұзақ ұстаған жоқ. Оның орнына бұрын алматылық «Қайратты» жаттықтырған Кахабер Цхададзе келді. Грузин бапкері келіп, «Ордабасының» екінші тынысы ашылғандай болған. Алайда, бәрі кеш еді. Турнир кестесіндегі өзге командалар қара үзіп кеткен.

Жүлдегерлер қатарынан көрініп, келесі жылғы еурокубоктік додаға жолдама аламыз деп мақсат қойған командаға бір ғана жол қалды. Үздік үштікке ену енді мүмкін емес. Бірақ, төртінші орынға көтеріліп, еурокубок турниріне жолдама алуға болады. Ол үшін қалған екі ойында жеңіске жетіп, турнирлік кестедегі көршілері «Ақтөбе» мен «Жетісудің» ұпай жоғалтқанын күту қажет. Алайда, төртінші орын алу да еурокубок бәсекелеріне қатысуға кепілдік бермейді. Регламентке сәйкес, еліміздің атынан 3 жүлдегер клуб пен ел кубогінің жеңімпазы «кәрі құрлықтың» турниріне қатыса алады. Ал, ел кубогінің финалы қараша айының соңында өтеді. Кубок үшін «Қайрат» пен «Атырау» таласпақ. Егер қазірдің өзінде күміс жүлдені иеленіп қойған «Қайрат» клубы кубоктің финалында жеңіске жетсе онда чемпионатта төртінші орын алған команда Еуропаға дайындалмақ. Алдағы 1 ай шымкенттік клуб үшін шешуші кезеңдердің бірі болмақ.

«Ордабасы» 32 турда петропавлдық «Қызылжар» клубына қонаққа барса, соңғы турда атыраулық футболшыларды Шымкентте қабылдайды.

Ерболат АЙНАБЕКОВ.

Бұл материалмен бөлісіңіз

Бұл материалда пікір жоқ